Bir müddət əvvəl ABŞ prezident seçkilərində müstəqil namizəd kimi iştirak etmək niyyətini açıqlayan kiçik Robert Kennedi NATO-nun xüsusilə Ukrayna hesabına genişlənməsinə qarşı çıxıb.
Bizimyol.info xəbər verir ki, siyasətçi bu barədə "Welt am Sonntag" qəzetinə müsahibəsində bildirib.
“Mən NATO-nun, xüsusən də Ukrayna hesabına genişlənməsinin əleyhinəyəm”, - deyə o qeyd edib. Kiçik Kennedinin fikrincə, keçmiş sovet respublikasında baş verənlər “arzulanan” münaqişəni ifadə edir.
"NATO bir təşkilat olaraq texnoloji inkişaf kimi bir çox səbəblərə görə sınaqdan keçirilməlidir. NATO-nun hazırkı versiyasının heç bir mənası yoxdur", - deyə o, təşkilatın fəaliyyətinə münasibət bildirib.
“Rusiya və Çinin hipersəs raketlərinə sahib olduğuna diqqət yetirsəniz, o zaman bir milyon Amerika əsgərini Atlantik okeanının o tayına yenidən yerləşdirmək necə mümkündür? Onların bir çoxu öləcək, Amerika xalqı buna icazə verməyəcək. Texnoloji reallıq bizi hərbi strategiyalarımızı yenidən düşünməyə məcbur edir”, - deyə Kennedi bildirib.
Siyasətçi hesab edir ki, Rusiya SSRİ-nin dağılmasından sonra “Avropa birliyinə qəbul edilməli idi” və onun sözlərinə görə, bu qiymətləndirməni ABŞ-ın bəzi diplomatları, o cümlədən SSRİ-nin keçmiş səfiri Corc Kennan da bölüşüb. "O zaman dedi ki, Rusiya ilə düşmən olmaq dəlilikdir. Rusiyanı Qərbdə xoş qarşılamaq lazımdır, onu Çinin qarşısına atmaq yanlışlıqdır”, - deyə Kennedy qeyd edib.
“1996-cı ildə, məşhur ABŞ siyasi xadimi və ABŞ prezidentinin keçmiş müşaviri Zbiqnev Bjezinski NATO-nun genişləndirilməsi təklifi ilə çıxış edəndə amerikalı diplomatlar israrla bu addıma qarşı xəbərdarlıq edirdilər”, - deyib. Onun sözlərinə görə, NATO-nun vəzifəsi dünyada müharibələr başlatmaq olmamalıdır. “Biz sülh istəyirik”, - ABŞ-ın 35-ci prezidenti Con Kennedinin qardaşı oğlu olan kiçik Kennedi vurğuladı.
ABŞ-da növbəti prezident seçkiləri 2024-cü ilin noyabrında keçiriləcək. Aprelin 25-də hazırkı prezident Co Bayden hökumətin ən yüksək vəzifəsinə yenidən seçilmək istəyəcəyini açıqlayıb. Amerika administrasiyasının keçmiş rəhbəri Donald Tramp 2022-ci ilin noyabrında seçki yarışına qatılacağını açıqlayıb.
Qadir, Bizimyol.info
