Azərbaycanın Rusiyadakı səfiri Polad Bülbüloğlu Küveyt Dövlətinin Rusiya Federasiyasına yeni təyin olunmuş səfiri Mənsur Ayəd Əl-Oteybini qəbul edib.
Səfirlikdən APA-ya verilən məlumata görə, görüş zamanı Azərbaycanın səfiri küveytli həmkarını təyinatı münasibəti ilə təbrik edərək ona gələcək fəaliyyətində uğurlar arzulayıb . Bundan əlavə, Polad Bülbüloğlu Moskvada akkreditə edilmiş diplomatik korpusun duayeni qismində fəaliyyəti, təşkil edilən çoxsaylı görüş və mədəni tədbirlər barədə qarşı tərəfi məlumatlandırıb.
Azərbaycan-Küveyt münasibətləri haqqında söz açan Polad Bülbüloğlu, bu xüsusda iki ölkənin İƏT və Qoşulmama Hərəkatı çərçivəsində faydalı əməkdaşlığını qeyd edib. Bununla yanaşı, iqtisadi, turizm və mədəniyyət sahələrində əməkdaşlığın daha da genişləndirilməsi üçün geniş imkanların olduğunu önə çəkib.
Polad Bülbüloğlu Ermənistan-Azərbaycan münaqişəsi, onun tarixi, aparılmış danışıqlar prosesi, BMT Təhlükəsizlik Şurasının məlum 4 qətnaməsi və digər beynəlxalq təşkilatlar çərçivəsində münaqişə ilə bağlı qəbul edilmiş çoxsaylı sənədlərin mahiyyətindən bəhs edərək, Ali Baş Komandan, Prezident İlham Əliyevin rəhbərliyi ilə müzəffər ordumuzun Vətən müharibəsində qazandığı parlaq qələbə haqda danışıb, Azərbaycanın öz suveren torpaqları naminə vuruşduğunu, beynəlxalq hüququn, haqq və ədalətin ölkəmizin tərəfində olduğunu bildirib. Eyni zamanda münaqişəyə son qoymuş məlum üçtərəfli Bəyanatın müddəaları və postmünaqişə dövrü, azad olunmuş ərazilərimizdə sürətlə aparılan genişmiqyaslı bərpa və yenidənqurma işləri barədə də qarşı tərəfə ətraflı məlumat verib.
Küveyt Dövlətinin Səfiri ölkəmizin ərazi bütövlüyünün bərpası münasibəti ilə təbriklərini çatdıraraq təmsil etdiyi ölkə tərəfindən Azərbaycanın haqlı mövqeyinin daim beynəlxalq təşkilatlar çərçivəsində dəstəkləndiyini söyləyib.
Bundan əlavə, Mənsur Ayəd Əl-Oteybi maraqlı və məhsuldar görüşə görə Səfir Polad Bülbüloğluna təşəkkürünü bildirib.
Həmçinin görüşdə regionda baş verən proseslər və maraq doğuran digər məsələlər ətrafında fikir mübadiləsi aparılıb.
Sonda qonağa Heydər Əliyev Fondu tərəfindən nəfis şəkildə çap edilmiş “Qarabağ işğaldan əvvəl və sonra” kitabı hədiyyə edilib.
