Körpələr arzularını eşitdirmək və ona çatmaq üçün ağlayırlar. Bəs onları dinləyən yoxdursa necə? Uşaqlar ac olanda və ya sizinlə olmaq istəyəndə ağlayırlar ki, arzuları gerçəkləşsin. Təəssüf ki, uşaq evlərində “ağlamaqla istədiyini almaq” anlayışı yoxdur.

Bizimyol.info Türkiyə mətbuatına istinadla xəbər verir ki, ağlamalarına cavab tapa bilməyən körpələr zamanla susurlar. Problemləri nə olursa olsun, özləri həll etməyə çalışırlar.

Uşaq evinə gedərək uşaqların yatdığı palataya tərəf gedəndə dəhlizdə sükut hökm sürür. Onlar yatıb zənn edərsiniz, amma palatalardan birinə girəndə oyaq olmasına baxmayaraq sakit olduqlarını görərsiniz. Siz "Ah, onlar necə də sakitdirlər!” -deyə düşünərsiniz, amma bu sükut ümidsizliyin sükutudur. Uşaqların sayı çox olduğuna görə, körpələr uzun müddət tək qalırlar. Onların susması, ehtiyaclarını qarşılamaq istəklərini dayandırmaqları deməkdir. Bu sakit uşaqlara diqqətlə baxsanız, onların tək oturub ayaqlarını tərpətdiyini görərsiniz.

Araşdırmalar göstərib ki, bu davranış heç bir şey hiss etməkdənsə, nəyisə hiss etmək cəhdi və insan sevgisinin olmamasına reaksiyadır.

Körpələr fiziki və emosional olaraq əhatə olunmaq istəyirlər. Yalnız bundan sonra onlar özlərini “bütöv” hiss edirlər.

Yatmazdan əvvəl qucaqlaşmaq istəyərlər. İşıqlar sönəndə ana və atanın laylaları və ya nağılları yoxdur. Bu səbəbdən uşaq evlərində böyüyən bu uşaqlar inkişafda problemlər yaşayır və digər insanlarla müsbət münasibət qurmaqda çətinlik çəkirlər. Əgər uşaqlar qucaqlaşmırsa, onlar ağrılarını daxili qəbul edirlər və nəticədə zəka, dil, nitq və söz ehtiyatında gecikmələr yaşayırlar. Bu, uşaqların beyninin inkişaf etməməsi ilə nəticələnir.

Emosional laqeydliklə yanaşı digər problemlər də var. Fiziki və cinsi istismar.

Bu stress nəticəsində, onlar yüksək səviyyədə stress hormonları istehsal edir və beyinlərinin arxitekturası zədələnir. 19 ölkədə 3800-dən çox uşağın iştirak etdiyi 75 tədqiqatın meta-analizində məlum olub ki, uşaq evlərində böyüyən uşaqlar ailələrdə böyüyən həmyaşıdlarından orta hesabla 20 bal aşağı İQ-ya malikdirlər. Onlar həmçinin boy və çəki kimi fiziki inkişafda gecikmələr yaşayırlar.

Yüksək səviyyədə apatiya, narahatlıq, itaətsizlik, hiperaktivlik, depressiya, diqqət əskikliyi, yuxu pozğunluqları, yemək pozğunluqları və titrəmə, özünə zərər vermə kimi təkrarlanan davranışlar meydana gəlir. Nəticə etibarilə bu uşaqların işsizlik, fahişəliklə məşğul olma, cinayət törətmə və ya insan alverinin qurbanı olma ehtimalı daha yüksək olur. Bununla yanaşı, uşaq evlərinin uşaqları da öz uşaqlarını uşaq evlərinə yerləşdirməyə daha çox meyllidirlər və bu, dövrün davam etməsinə səbəb olur.

Körpəyə verə biləcəyiniz ən gözəl hədiyyə sevgi dolu qucaqlaşmanızdır...

İlahin, Bizimyol.info