İsrailin baş naziri Benyamin Netanyahu Qəzza zolağında hərbi fəaliyyətlərə görə Haaqa Beynəlxalq Cinayət Məhkəməsi (BCM) tərəfindən onun adına həbs orderinin verilməsi ehtimalından ciddi narahatdır.

Bizimyol.info xəbər verir ki, bu barədə “Maariv” qəzeti məlumat yayıb.

Nəşrin mənbələrinin verdiyi məlumata görə, son günlər hökumət başçısı hadisələrin belə inkişafının qarşısını almaq üçün ciddi səylər göstərir. Xüsusilə, o, ABŞ prezidenti Co Baydenə dolayı təzyiqlər də daxil olmaqla, bu məsələdə özü üçün hər hansı müsbət nəticə əldə etmək məqsədilə çoxsaylı telefon danışıqları aparıb.

Bununla belə, "Maariv"ın yazdığı kimi, Beynəlxalq Cinayət Məhkəməsinin Netanyahuya qarşı order verməsi an məsələsi ola bilər. Bundan əlavə, qəzetin fərziyyəsinə görə, Qəzza zolağında davam edən hərbi əməliyyatlar fonunda Haaqa məhkəməsi İsrailin müdafiə naziri Yoav Qalantı və Baş Qərargah rəisi Herzi Halevi də axtarışa verə bilər.

Nəşrin qeyd etdiyi kimi, Netanyahu bunun qarşısını almaq üçün gecə-gündüz işləyir və "Maariv"ın yazdığına görə, göstərilən səylərin dolayı əlaməti Fələstin anklavında saxlanılan girovların azad edilməsi ilə bağlı danışıqlarda İsrailin mövqeyinin bir qədər yumşaldılması ola bilər.

Aprelin 26-da Netanyahu BCM-nin ölkəsinə qarşı mümkün hərəkətləri ilə bağlı rəsmi açıqlama verərək, bu qurumun “İsrailin ayrılmaz özünümüdafiə hüququna” zərbə vurmaq cəhdlərinə imkan verməyəcəyini vurğulayıb. Baş nazirin sözlərinə görə, İsrailin təmsil etdiyi “Yaxın Şərqdə yeganə demokratiyanın” hərbçilərinin və rəsmilərinin həbs təhlükəsi qlobal miqyasda “təhlükəli presedent yaradacaq”.

Bundan əvvəl İsrail televiziyasının 12-ci kanalı məlumat vermişdi ki, yəhudi dövlətinin hakimiyyət orqanları Qəzza zolağında baş verən hadisələrlə bağlı yüksək rütbəli İsrail məmurlarına qarşı BCM-nin mümkün həbs orderlərinin verilməsindən ciddi qorxuya düüşüblər. Eyni zamanda, “Kanal 12”nin Haaqadakı mənbələri qeyd edirlər ki, bu, ABŞ-ın sanksiyası olmadan baş tutmayacaq.

Fevral ayında BCM-nin prokuroru Kərim Xan demişdi ki, agentlik Qəzzada mümkün cinayətləri fəal şəkildə araşdırır.

Qadir, Bizimyol.info