Rusiyalı müxalif siyasətçi Aleksey Navalnı 47 yaşında vəfat edib.

Bizimyol.info xəbər verir ki, Rusiya Federal Həbsxana Xidmətindən verilən açıqlamada müxalifət liderinin gəzintidən sonra xəstələndiyi və huşunu itirdiyi bildirilib.

Həbsxanaya çağırılan tibb işçilərinin və təcili yardımın təcili müdaxiləsinə baxmayaraq, Navalnının həyata qaytarmaq cəhdlərinin nəticəsiz qaldığını vurğulayan Rusiya Federal Həbsxana Xidməti ölüm səbəbinin araşdırıldığını açıqlayıb.

2021-ci ildən Şimal qütbünə yaxın Yamal yarımadasındakı həbsxanada saxlanılan rusiyalı müxalif siyasətçi Aleksey Navalnı 2023-cü ildə ekstremist təşkilat yaratmaq, maliyyələşdirmək və bu təşkilatda fəaliyyət göstərmək ittihamı ilə 19 il müddətinə azadlıqdan məhrum edilib.

Aleksey Navalnı bütün Rusiyada böyük kütlələri hökumət əleyhinə etirazlara cəlb edə bilən yeganə rus müxalifət lideri kimi tanınırdı. Navalnı sosial şəbəkədəki son açıqlamasında Yamal yarımadasındakı həbsxanada olduğunu təsdiqləyərək: “Məni bura ciddi ehtiyat tədbirləri ilə və qəribə bir marşrutla gətirdilər. Yanvarın ortalarına kimi kiminsə məni tapacağını gözləmirdim. Ona görə də dünən kameranın qapısı açılıb: “Sizinlə görüşə bir vəkil gəlib” deyəndə çox təəccübləndim. Mənə dedi ki, sən məni itirmisən, hətta bəziləriniz narahatdır. Dəstəyiniz üçün çox sağ olun”, - o, Şimal Dairəsinin içində yaşadığını bildirərək özünü Şaxta baba kimi təqdim edib.

Navalnı Rusiya elitasının mərkəzində korrupsiyada ittihamlar irəli sürməklə şöhrət qazandı. Onun onlayn yayımlanan sənədli filmlərinə milyonlarla dəfə baxılıb. Aleksey Navalnı əvvəllər bir neçə dəfə qısamüddətli həbsdə olub. Sonuncu dəfə icazəsiz nümayiş təşkil etdiyi üçün 2019-cu ilin iyulunda 30 sutka həbs cəzası alan Navalnı həbsxanada dermatit xəstəliyinə tutulub və həkimi müxalifət liderinin zəhərlənmiş ola biləcəyini bildirib.

Navalnı 2020-ci ilin avqustunda Moskvaya getdiyi təyyarədə pisləşib və müalicə üçün Almaniyaya aparılıb. Navalnının hava limanında içdiyi çaydan zəhərlənmiş ola biləcəyi açıqlanıb.

2021-ci ildə sağaldıqdan sonra saxlanıla biləcəyi xəbərdarlığına baxmayaraq, Navalnı Rusiyaya qayıdıb və Moskvanın Vnukovo hava limanına ayaq basan kimi saxlanılıb.

Navalnının ölüm xəbərindən sonra Kremldən açıqlama gəlib. Kremlin sözçüsü Dmitri Peskov: “Xüsusi göstəriş verməyə ehtiyac yoxdur, Rusiya Federal Penitensiar Xidməti lazımi araşdırmaları aparır”, - deyib.

Qadir, Bizimyol.info