ABŞ Konqresinin Nümayəndələr Palatası prezidentə qeyri-müəyyən müddətə İran iqtisadiyyatına qarşı sərt sanksiyalar tətbiq etməyə imkan verən qanun layihəsini təsdiqləyib.
Bizimyol.info xəbər verir ki, səsvermə çərşənbə axşamı "C-SPAN" tərəfindən yayımlanıb.
Qanun layihəsinin lehinə 407 deputat, əleyhinə 16 deputat çıxış edib. Sənəd indi baxılmaq üçün ABŞ Senatına göndəriləcək.
2023-cü ilin may ayında təklif edilən qanunvericilik 2026-cı ildə başa çatacaq 1996-cı il İran Sanksiya Aktını (ISA) daimi edəcək. Konqres tərəfindən davamlı olaraq yenilənməli olan ISA, ABŞ icra hakimiyyətinə nüvə silahı hazırlamaq səylərini dayandırmaq üçün xüsusilə İranın enerji sektoruna sanksiyalar tətbiq etməyə icazə verir.
Vaxt keçdikcə prezidentin səlahiyyətləri genişləndirildi və İran sənayesinin digər sahələrinə məhdudiyyətlər tətbiq etmək imkanı verildi. Konqresin qanunun müddətini əhəmiyyətli dərəcədə uzatmaq cəhdləri əvvəllər də cəhd edilib, lakin qanunverici orqanın hər iki palatasından keçə bilməyib.
ABŞ Konqresinin aşağı palatası Tehranın raket və dronların hazırlanmasında istifadə oluna biləcək ABŞ mallarının və texnologiyalarının İrana ixracına, təkrar ixracına əlavə məhdudiyyətlər tətbiq edən qanun layihəsini də dəstəkləyib. Bundan əlavə, Nümayəndələr Palatası prezidentdən “beynəlxalq terrorizmi və ya kütləvi qırğın silahlarının yayılmasını dəstəkləmək” məqsədilə İrana qarşı sanksiyalar rejimində humanitar istisnalardan istifadənin qarşısını alacaq qaydalar tətbiq etməyi tələb edən təşəbbüsün lehinə səs verib.
Ötən bazar ertəsi Konqresin Nümayəndələr Palatası İrandan enerji almağa görə Çin maliyyə institutlarına qarşı sanksiyaların tətbiqi imkanını nəzərdə tutan qanun layihəsini, eləcə də Tehrana qarşı yönəlmiş digər qanunvericilik təşəbbüslərinin siyahısını dəstəkləyib. Bütün bu qanun layihələri də baxılmaq üçün Senata gəlir.
Qadir, Bizimyol.info
