İran prezidenti İbrahim Rəisi aprelin 22-də Pakistana iki günlük səfər etməyi planlaşdırır.

Bizimyol.info xəbər verir ki, bu barədə diplomatik dairələrdəki mənbələrə istinadən “The News International” qəzeti məlumat yayıb.

İran səfirliyindəki mənbələr nəşrə bildiriblər ki, səfərin qrafiki hələ İslamabad və Tehran tərəfindən rəsmi olaraq açıqlanmayıb, lakin Rəisinin Pakistana səfər planı artıq təsdiqlənib. Pakistan Xarici İşlər Nazirliyi də gözlənilən səfəri təsdiqləyib.

Rəisi ilə Şahbaz Şərif arasında danışıqların əsas mövzusunun Yaxın Şərqdəki son hadisələr və regional təhlükəsizlik vəziyyəti olacağı gözlənilir. Gündəliyə həmçinin ikitərəfli münasibətlər, təhlükəsizlik sahəsində əməkdaşlıq, qaz kəmərinin tikintisi və potensial azad ticarət sazişinin müzakirəsi daxildir.

Baş nazir Şərifi vəzifəyə başlaması münasibətilə ilk təbrik edən Rəisi olub.

Aprelin 13-ü axşam saatlarında İran İsrailə qarşı pilotsuz təyyarələr və raketlər ataraq bunu “çoxsaylı cinayətlərə”, o cümlədən İranın Dəməşqdəki səfirliyinin konsulluq bölməsinə İsrailə aid edilən hücuma cavab adlandırıb. İran dövlət mediası İsrailə hücumların hərbi hədəfləri hədəf aldığını bildirib. İsrail Müdafiə Qüvvələri yəhudi dövlətinə doğru uçan 300-ə yaxın İran mərmisinin 99%-ni vurduqlarını və Nevatim aviabazasına cüzi ziyan dəydiyini bildirib.

Qadir, Bizimyol.info