Avropa İttifaqının (Aİ) Xarici Əlaqələr və Təhlükəsizlik Siyasəti üzrə Ali Nümayəndəsi Josep Borrell, İkinci Dünya Müharibəsindən sonra avropalılar arasında əldə edilən sülhün istisna olduğunu ifadə edərək: “Şükürlər olsun ki, müharibə vəziyyətində deyilik və olmayacağıq”,- deyib.

Bizimyol.info xəbər verir ki, Ali Nümayəndə Borrell İspaniyanın "La Sexta" televiziyasında yayımlanan "El Intermedio" verilişində qonaq qismində Rusiya-Ukrayna müharibəsini dəyərləndirib.

Borrell: "Avropanın şərqində müharibə var. İki ildir ki, davam edir və bitəcək kimi görünmür. Biz avropalılar başa düşməliyik ki, aramızda olan sülh istisnadır. Dünyada həddən artıq zorakılıq var və qəddar qüvvələr getdikcə üstünlük təşkil edir. Müharibə olan yerlərdə coğrafiya vacibdir. Ukrayna və Qəzzada döyüş quru üzərindədir. Şükürlər olsun ki, biz müharibədə deyilik və olmayacağıq da, lakin müdafiə qabiliyyətimizi artırmaq barədə düşünməyə başlamalıyıq”, - deyib.

Borrell deyib ki, Aİ ölkələrinin Ukraynaya ordu göndərməsi gündəmdə deyil, çünki onlar müharibə vəziyyətində deyillər: “Əgər biz müharibədə olsaydıq, indi III Dünya Müharibəsi haqqında danışardıq. İndiyə qədər gördüyümüz iş Ukrayna ordularını öz torpaqlarında döyüşmək üçün öyrətməkdir. İndiyədək biz 40 mindən çox ukraynalı əsgərə təlim keçmişik. Biz Ukraynaya kömək edirik və kömək edəcəyik. Bunu etməsək, Ukrayna özünü müdafiə edə bilməz. Burada fərq ondan ibarətdir ki, müharibədə olan ölkəyə kömək etmək bir şeydir, müharibədə iştirak etmək başqa şeydir”, - deyə bildirib.

"Rusiya üçün uduzmamaq kifayətdir. Ukrayna qalib gəlməlidir. Rusiya iki həftəlik müharibə istəyirdi. Onun planı bu idi. Plan iki həftəyə gəlib Belarusdakı kimi marionet hökuməti qurmaq və Sibirə bir o qədər də ukraynalı göndərmək idi, amma bu baş tutmadı. İki həftə deyil, iki il çəkdi. Onun üçün sadəcə məğlub olmamaq kifayət deyil, o, qalib gəlməlidir. Bu, əzmkarlıq deməkdir və indiyə qədər bunu ediblər. Və heç kimin gözləmədiyi şəkildə. Təbii ki, mən də bunu gözləmirdim. Ukraynalılar nə üçün vuruşduqlarını bilirlər, amma rus əsgərləri o qədər də deyil", - deyə Borrell qeyd edib.

Rusiyanın Ukraynaya müdaxiləsinə iki həftə qalmış Kiyevdə Ukrayna prezidenti Vladimir Zelenski ilə görüşdüyünü xatırladan Aİ-nin ali nümayəndəsi aralarındakı dialoqu belə xarakterizə edib: "Onlar mənə dedilər ki, Rusiya bizi işğal edəcək. Onlar bunu edəndə bilirəm ki, ispan gəncləri Kiyev uğrunda ölməyə gəlməyəcəklər, amma deyin, bizə lazım olan, özümüzü müdafiə edə biləcəyimiz silahları verəcəksiniz?. Cavab bəli olub və bəli olmağa davam etməlidir".

Qadir, Bizimyol.info