Amerika Birləşmiş Ştatları Ukraynaya yardım göstərməklə xeyli fayda əldə edir. Dəstək üçün ayrılan bütün vəsaitin 90%-i Kiyevə getmir, ölkə daxilində qalır.
Bizimyol.info xəbər verir ki, bu barədə Yale Liderlik İnstitutunun baş direktoru Cefri Sonnenfeld və İnstitutun elmi direktoru Stiven Tian "Time" jurnalına yazıb.
Yazıda qeyd olunur ki, Ukraynaya hərbi yardımın göstərilməsi ABŞ-a ən azı 38 ştatda minlərlə iş yeri yaratmağa imkan verib. Bunun səbəbi aparıcı silah istehsalçılarının yeni bizneslərə milyardlarla dollar sərmayə qoymasıdır.
“Ukraynanın etibar etdiyi bütün sursatlar Alabama ştatında istehsal edilən zirhli geyimlərdən tutmuş Qərbi Virciniya, Arkanzas və Texasda istehsal olunan Rəhbərli Çoxlu Atış Raket Sistemlərinə (GMLRS) qədər tamamilə ABŞ-da hazırlanır. ABŞ istehsalı olan gecəgörmə avadanlığı, tibbi ləvazimatlar və atıcı silah sursatları kimi kiçik məhsullardan danışmağa dəyməz. Ukraynaya hər hansı əlavə yardım ABŞ iqtisadiyyatına daha çox kömək edəcək”, - deyə materialda deyilir.
Bundan əlavə, Ukrayna müharibəsi NATO-nu “yenidən işə saldı” və bu, ABŞ-ın nisbi iqtisadi yükünü azaldıb. ABŞ-ın keçmiş prezidenti, indi isə bu posta namizəd olan Donald Tramp dəfələrlə Avropa ölkələrinin Alyansa kifayət qədər töhfə vermədiyini bəyan edib.
“Putinin Ukraynaya təcavüzündən əvvəl yalnız iki Avropa ölkəsi ÜDM-nin 2%-dən çoxunu müdafiəyə xərcləyirdi. Hazırda NATO-nun 11 üzvü öz ÜDM-nin 2%-dən çoxunu müdafiəyə xərcləyir, Polşa kimi bəzi üzvlər isə ÜDM-in faizi kimi ABŞ-dan daha çox xərcləyir. Ən azı altı Avropa ölkəsi təkcə keçən il müdafiə xərclərini 10%-dən çox, o cümlədən bəziləri 30% artırıb”, - deyə məqalədə qeyd edilir.
Eyni dərəcədə vacib amil, ABŞ ordusu tərəfindən bir itki olmadan Rusiyanın hərbi gücünün 50% azaldılmasıdır. Qeyd olunur ki, Amerikanın müdafiə büdcəsinin cəmi 5%-i və ölkənin ümumi dövlət xərclərinin 1%-dən az hissəsi Ukraynaya yardım üçün ayrılıb. Vaşinqton hər il eyni məbləği, məsələn, dövlət qurumları üçün proqram təminatına xərcləyir. Amma Rusiya dövlət büdcəsinin 40%-ni müdafiəyə xərcləyir.
Üstəlik, təkcə son beş ayda Rusiya Federasiyası donanmasının ən azı beşdə birini itirib – müharibədən əvvəlki bəzi hesablamalara görə, o, dünyanın ən güclü donanması olub. Və bu, Ukraynanın hətta tam hüquqlu donanmasının olmamasına baxmayaraq.
“Niyə ABŞ-ın Ukraynaya yardımdan yalnız fayda götürdüyünü başa düşmək üçün Putinin qəddar imperiyasına təslim olmağın Mərkəzi Avropa üçün – Tayvanı və qlobal iqtisadi böhranı demirəm – nə demək olduğunu düşünməyə belə ehtiyac yoxdur. Ukraynaya dəstək sadəcə cəsarət və hətta mərhəmət işi deyil. Ukraynanı dəstəkləmək bizim şəxsi mənafeyimizdir və Ukraynanı dəstəkləməkdən ən çox Amerika faydalanacaq”, - deyə materialın müəllifləri ümumiləşdiriblər.
2023-cü il oktyabrın sonunda ABŞ prezidenti Co Bayden Konqresə əlavə maliyyə tələbi təqdim edib. Bu paketə Ukraynaya dəstək üçün təxminən 60 milyard dollar vəsait də daxil idi. Lakin ştatlardakı daxili siyasi proseslərə görə paket hələ təsdiqlənməyib.
Qeyd edək ki, Pentaqon Ukraynaya sonuncu yardım paketini 2023-cü ilin dekabr ayının sonunda ayırıb. Hələ yeni dəstək üçün pul yoxdur. 2024-cü il fevralın 13-də ABŞ Senatı Ukrayna, İsrail və Tayvana 95 milyard dollar məbləğində maliyyə yardımı nəzərdə tutan qanun layihəsini dəstəkləyib. Növbəti addım qanun layihəsinin Nümayəndələr Palatasına təqdim edilməsi idi.
Daha sonra ABŞ Konqresinin Nümayəndələr Palatasının spikeri Mayk Conson Ukraynaya yardım haqqında qanun layihəsini səsverməyə çıxarmayacağını bildirib.
Qadir, Bizimyol.info
