İsrail rəhbərliyi Fələstinin radikal HƏMAS hərəkatının girovların azad edilməsi ilə bağlı yeni təklifini rədd edib.

Bizimyol.info xəbər verir ki, bu barədə "Axios" portalı mənbələrə istinadən məlumat yayıb.

Verilən məlumata görə, HƏMAS nümayəndələri ötən bazar günü Qətər və Misirdəki vasitəçilərin köməyi ilə üç mərhələdə girovların azad edilməsini nəzərdə tutan yeni razılaşma təklifi irəli sürüblər. Onların hər birində bir aydan çox davam edən humanitar sakitlik yaradılması təklif edilib. Eyni zamanda, HƏMAS nümayəndələri razılaşmaların həyata keçirilməsinin ilk mərhələsində İsraildən 40 girovun azad edilməsi müqabilində Qəzza zolağının ərazisindən qoşunlarını çıxarmağa başlamağı tələb ediblər. Portala məlumat verən mənbələrə görə, sövdələşmənin hərbi əsirlərin azad edilməsini nəzərdə tutan üçüncü mərhələsinin həyata keçirilməsi “münaqişənin sonu” demək idi.

Portal yazır ki, İsrail təklif olunan sazişi rədd edib, lakin İsrail rəsmilərindən biri deyib ki, bu təklifin özü Həmasın Qəzzada döyüşlər davam etdiyi halda belə, girovların azad edilməsi üçün yeni saziş üzrə danışıqlara hazır olduğunu nümayiş etdirir. Qeyd edilir ki, HƏMAS nümayəndələri əvvəllər təkid edirdilər ki, onlar yalnız Fələstin anklavında döyüşlər bitərsə, yeni saziş üzrə danışıqlara hazır olacaqlar.

Adı açıqlanmayan bir İsrail rəsmisi portala bildirib ki, yəhudi dövlət rəsmiləri bu təklifi əsassız hesab ediblər və vasitəçilərdən daha məqbul bir təklif hazırlamağa çalışmalarını xahiş ediblər. Onun sözlərinə görə, hazırda bu istiqamətdə işlər aparılır.

Qəzza zolağından HƏMAS yaraqlılarının 7 oktyabr 2023-cü ildə İsrailə iri raket hücumu həyata keçirərək onun ərazisini işğal etməsindən sonra bölgədə vəziyyət kəskin şəkildə pisləşib. Hücum sərhədyanı qəsəbələrin sakinlərinin öldürülməsi və qocalar, qadınlar və uşaqlar da daxil olmaqla 240-dan çox girovun əsir götürülməsi ilə müşayiət olunub.

Radikallar bu hücumu İsrail hakimiyyətinin Qüdsdəki Əl-Əqsa məscidinə qarşı hərəkətlərinə cavab adlandırıblar. İsrail Fələstin anklavına cavab zərbələri endirməyə başlayıb və sonra orada quru əməliyyatına başlayıb.

Qadir, Bizimyol.info