Bəzi təchizatçılar Pentaqonun anbarlarından Ukraynaya tədarük edilən silahları artırmaq üçün ABŞ Müdafiə Nazirliyi ilə sabit qiymətlərlə uzunmüddətli müqavilələr bağlamaq istəmirlər.
Bizimyol.info xəbər verir ki, bu nəticə Konqresin Hesabatlılıq Ofisi "GAO" (Hökumət Hesabatlılığı Ofisi) tərəfindən çərşənbə axşamı dərc edilmiş hesabatda yer alıb.
“ABŞ ordusu Ukraynaya verilən beş növ silahın dəyişdirilməsinə kömək etmək üçün çoxillik satınalma müqavilələri bağlayıb və ya bağlamağı planlaşdırır. Bununla belə, DoD rəsmiləri və podratçı nümayəndələri GAO-ya bu səlahiyyətləri həyata keçirməkdə çətinliklərlə üzləşdiklərini söylədilər. Bəzi təchizatçılar bir neçə il əvvəldən konkret qiymətlər müəyyən edən uzunmüddətli müqavilələr bağlamaq istəmirlər”, - deyə hesabatda qeyd olunur.
Hesabat müəlliflərinin fikrincə, hərbi idarə Ukraynaya öz ehtiyatlarından milyardlarla dollar dəyərində silah verib: “2024-cü ilin mart ayına olan məlumata görə, Konqres Müdafiə Nazirliyinin bu silahları əvəz etmək üçün istifadə edə biləcəyi 25,9 milyard dollar əlavə maliyyə ayırıb. 31 dekabr 2023-cü il tarixinə Müdafiə Nazirliyi bu vəsaitin 70%-dən çoxunu - 18 milyard dollardan çoxunu istifadə etməyi öhdəsinə götürüb. 16 milyard dollardan çox vəsait silah-sursatın alınması və istehsal bazasının genişləndirilməsinə, yerdə qalan vəsait isə Müdafiə Nazirliyinin nəqliyyat və logistika xərclərinin ödənilməsinə yönəldilib”, - deyə GAO-dan bildirilib.
Bundan əlavə, sənəddə qeyd edilir ki, Pentaqon təchizat zəncirində bir çox problem aşkar edib: “Bir qayda olaraq, bunlar "COVID-19" pandemiyası və Ukraynadan artan tələblər, eləcə də digər amillər kimi hallar ilə ağırlaşan çoxdankı problemlərdir. Təchizatçıların hissələri və xammalları ilə bağlı uzun gözləmə müddətləri bir çox silah proqramlarına təsir edir”, - deyə hesabat müəllifləri bildiriblər.
Pentaqonun məlumatına görə, Co Baydenin prezidentliyi başlayandan bəri ABŞ Ukraynaya 44,9 milyard dollardan çox, o cümlədən Rusiyanın "xüsusi hərbi əməliyyat"ı başlayandan bəri 44,2 milyard dollardan artıq təhlükəsizlik yardımı göstərib”.
Qadir, Bizimyol.info
