ABŞ-ın keçmiş prezidenti Donald Tramp polisin dağıtmağa çalışdığı Kolumbiya Universitetində Fələstin tərəfdarı etirazlarla bağlı Amerika lideri Co Baydenin hərəkətsizliyini tənqid edib.
Bizimyol.info xəbər verir ki, o, bu barədə "Fox News"da açıqlamasında bildirib.
“İzləmək çox üzücüdür. Üç, dörd, beş il əvvəl bunun baş verəcəyini düşünmək belə mümkün deyildi. Bayden nəsə etməlidir. Bayden ölkəmizin səsi olmalıdır, amma o, heç kimin eşitmədiyi belə bir səsdir. Onun nə isə edə biləcəyini düşünmürəm”, - deyə keçmiş prezident qeyd edib.
Mətbuatın verdiyi məlumata görə, Kolumbiya Universitetinin yaxınlığında yüzlərlə polis əməkdaşı var. Yaxınlıqdakı küçələr bağlanır, şlaqbaumlar qoyulur, saxlanılanları polis bölmələrinə çatdırmaq üçün avtobuslar gətirilib.
Bundan əvvəl Nyu-York polisinin mətbuat xidməti verdiyi məlumatda bildirilir ki, Kolumbiya Universitetinin ərazisinə daxil olmaq icazəsi ilə hüquq-mühafizə orqanlarına məktub göndərdiyini təsdiqləyib. Yerli medianın məlumatına görə, polis artıq ora daxil olub və nümayişçiləri saxlayır. Polis saxlanılanların dəqiq sayını açıqlamır.
Universitet baş verənlərlə bağlı mətbuata hələ də cavab verməyib.
CNN televiziyasının məlumatına görə, ABŞ polisi artıq Amerika universitetlərinin binalarında keçirilən Fələstin tərəfdarı nümayişlərin mindən çox iştirakçısını həbs edib. Nyu-Yorkdakı Kolumbiya Universiteti ilə yanaşı, Bostondakı Emerson Kollecini (Massaçusets), Bostonda yerləşən Şimal-Şərqi Universiteti, Los Ancelesdəki Cənubi Kaliforniya Universiteti, Texas Universiteti, Bloominqtondakı İndiana Universiteti və Atlantadakı Emory Universiteti, Arizona Dövlət Universiteti, Princeton Universiteti, Yale Universiteti, Nyu York Universiteti, Minnesota Universiteti və Ohayo Dövlət Universitetlərinin tələbələri də həbs olunur.
2023-cü il oktyabrın 7-də Fələstin radikal HƏMAS hərəkatının yaraqlılarının Qəzza zolağından İsrail ərazisinə soxulması, sərhədyanı yaşayış məntəqələrinin sakinlərinin öldürülməsi və 240-dan çox insanın girov götürülməsindən sonra Yaxın Şərqdə vəziyyət kəskin şəkildə pisləşib. Buna cavab olaraq İsrail Fələstin anklavında HƏMAS-ın hərbi və siyasi strukturlarını məhv etmək və oğurlananların hamısını azad etmək məqsədi ilə hərbi əməliyyata başlayıb. Bu günə qədər davam edən İsrailin hərbi əməliyyatları nəticəsində 34,3 min fələstinli ölüb, daha 77,3 min nəfər yaralanıb.
Qadir, Bizimyol.info
