“İsrailin Qəzza zolağındakı hərəkətləri Fələstin xalqının tamamilə məhv edilməsi siyasətinin məqsədyönlü şəkildə həyata keçirilməsindən xəbər verir”.
Bizimyol.info xəbər verir ki, bu fikri İranın xarici işlər naziri Hüseyn Əmir Abdullahiyan xüsusilə BMT-nin baş katibi Antonio Quterreş və dünya təşkilatının Təhlükəsizlik Şurasının sədri Kazuyuki Yamazakiyə (Yaponiya) göndərdiyi məktubda bildirib.
Mətni respublika Xarici İşlər Nazirliyinin rəsmi "Telegram" kanalında dərc olunan sənəddə Abdullahyan qeyd edib ki, İsrail Qəzzaya humanitar yardım göndərilməsinin qarşısını alaraq və zolağı tam mühasirədə saxlayaraq, Fələstinin mövcudluğunu və xalqının bütün əlamətlərini burada silmək, anklav və İordan çayının qərb sahilinin sakinlərini zorla qonşu ölkələrə qovmaq niyyətindədir. “Bu yanaşma göstərir ki, bu cinayətkar rejim qəsdən Fələstin xalqını və onun milli kimliyini tamamilə məhv etmək siyasəti yürüdür”, - deyə nazir qeyd edib.
İran Xarici İşlər Nazirliyinin rəhbəri müsəlmanların müqəddəs Ramazan ayında İsrailin fələstinlilərə qarşı hər hansı təcavüzkar hərəkətinin qarşısının alınması üçün təsirli tədbirlərin görülməsinin vacibliyini bəyan edib.
2023-cü il oktyabrın 7-də Fələstin radikal HƏMAS hərəkatının yaraqlılarının Qəzza zolağından İsrail ərazisinə soxulması, sərhədyanı qəsəbələrin sakinlərinin öldürülməsi və əsir götürülməsindən sonra Yaxın Şərqdə vəziyyət kəskin şəkildə pisləşib. Buna cavab olaraq İsrail Qəzzanı tam blokada elan edib. Livan və Suriyanın müəyyən ərazilərinə zərbələr endirməyə başlayıb, bundan sonra anklavda quru əməliyyatına başlayıb. İordan çayının qərb sahilində də toqquşmalar baş verir.
Ramazan ayı martın 10-da günəş batan kimi başlasa da, İsrail Qəzza zolağındakı hədəfləri vurmağa davam edir. Martın 3-dən 7-dək Misir, Qətər, ABŞ və HƏMAS nümayəndələri arasında sektorda atəşkəs rejiminin tətbiqi şərtlərinin razılaşdırılması üçün Qahirədə məsləhətləşmələr keçirilib. Martın 5-də Əl-Ərəbiyyə telekanalı bildirib ki, məsləhətləşmə iştirakçıları Ramazan ayının ən azı ilk həftəsi üçün humanitar fasilənin tətbiqi ilə bağlı razılığa gəliblər.
Qadir, Bizimyol.info
