Yaponiyanın “Space One” şirkəti tərəfindən həyata keçirilən peyklə ilk şəxsi daşıyıcısının buraxılışı uğursuzluqla başa çatıb. Raket buraxıldıqdan bir neçə saniyə sonra partlayıb.

Bizimyol.info xəbər verir ki, raket qalıqları buraxılış sahəsinin yaxınlığındakı dağlara düşüb. Onların düşdüyü yerdə güclü yanğın baş verir və qatı tüstü sütunu qalxır. Uğursuzluğun səbəbi hələlik məlum deyil.

Raket Yerin səthini müşahidə etmək üçün nəzərdə tutulmuş təxminən 100 kq ağırlığında peyki daşıyırdı. Müvəffəqiyyətli olsaydı, bu, tamamilə özəl bir Yapon şirkəti tərəfindən həyata keçirilən ilk peyk buraxılışı olacaq.

“Kairos” raketinin uzunluğu 18 m, çəkisi isə təxminən 23 ton olub. Qərargahı Tokioda yerləşən “Space One” 2018-ci ildən onun hazırlanması ilə məşğuldur. Bu müddətdə şirkət həmçinin Vakayama prefekturasında öz buraxılış sahəsini qurub.

Hökumətdə kosmik sənayenin inkişafına nəzarət edən İqtisadi Təhlükəsizlik Naziri Sanae Takaichi tərəfindən əvvəllər bildirildiyi kimi, Yaponiya 2030-cu illərin birinci yarısının sonuna qədər illik raket buraxılışlarının sayını təxminən 30-a çatdırmaq istəyir. Bu rəqəmə özəl şirkətlər tərəfindən həyata keçirilən buraxılışlar da daxildir.

Yaponiya Aerokosmik Tədqiqatlar Agentliyi (JAXA) son 10 ildə 30-dan çox kosmosa buraxılış həyata keçirib. Bundan əlavə, "Mitsubishi Heavy Industries" dövlət korporasiyası mütəmadi olaraq kəşfiyyat peykləri buraxır.

Qadir, Bizimyol.info