Böyük Britaniya Rusiya Federasiyası Mərkəzi Bankının ölkədəki dondurulmuş aktivlərinin hamısını Ukraynaya verməyə hazırdır, çünki Rusiya müharibə bitdikdən sonra Kiyevə təzminat ödəmək məcburiyyətində qalacaq.

Bizimyol.info xəbər verir ki, “The Guardian” yazdığına görə, bunu Britaniyanın xarici işlər naziri Devid Kemeron deyib.

“Rusiya təzminat ödədikdə geri qaytaracağımızı bilə-bilə bu pulu ukraynalılara təqdim etmək üçün əslində dondurulmuş Rusiya aktivlərindən girov kimi istifadə edən sindikatlaşdırılmış kredit və ya istiqraz kimi bir şeydən istifadə etmək imkanı var. Bu, ən yaxşı yol ola bilər. Biz bu məsələdə maksimum G7 və Aİ birliyində nail olmağa çalışırıq, lakin bu olmasa, belə tədbirlər görmək istəyən müttəfiqlərlə irəliləməyə məcbur olacağıq”, - deyə nazir qeyd edib.

Onun sözlərinə görə, aktivlər təzminatların ödənilməsi üçün təminat kimi istifadə olunacaq. Kemeron istiqraz planının heç bir şəkildə London şəhərinin reputasiyasına xələl gətirəcəyinə inanmadığını söyləyib.

Mətbuatın yazdığına görə, bu plan Avropa İttifaqında müzakirə olunan təkliflərdən daha radikaldır, nəinki Ukraynaya Qərbin əlində olan Rusiya Mərkəzi Bankının aktivlərindən yalnız bir qazanc vermək. Qeyd edilir ki, bu illik əlavə mənfəət 4 milyard dollar qiymətləndirilir.

ABŞ Konqresi Ukraynaya yardımı əngəlləməkdə davam edərsə, bu plan Ukrayna üçün xüsusilə faydalı olar, çünki bu, silah alışı və büdcə kəsirinin maliyyələşdirilməsi üçün yeni maliyyə mənbəyi kimi aktivləşə bilər. ABŞ Rusiyanın aktivlərinin müsadirə olunmasının tərəfdarıdır. Maliyyə naziri Janet Yellen təxminən 300 milyard dolların dərhal müsadirə edilməsini və onun Ukraynanın uzunmüddətli yenidən qurulması üçün istifadə edilməsini istəyib.

Eyni zamanda bəzi Aİ ölkələri belə radikal addımdan çəkinirlər. Ən böyük ehtiyatlılığı Fransa və Almaniya, eləcə də Avropa Mərkəzi Bankı ifadə edib. Məsələ barədə məlumatlı olanlar deyirlər ki, onlar Rusiyanın Avropa aktivlərinə qarşı qisas alınmasından, həmçinin maliyyə sabitliyinə və avronun ehtiyat valyuta statusuna təsirindən narahatdırlar.

Qadir, Bizimyol.info