Koreya Respublikasının xarici işlər naziri Ço Tae-yol, onun yaponiyalı həmkarı Yoko Kamikava və ABŞ dövlət katibi Antoni Blinken Braziliyada keçirilən üçtərəfli görüşdə Koreya Xalq Demokratik Respublikası (KXDR) və Rusiya Federasiyası arasında əməkdaşlığı sülh və sabitliyə ciddi təhlükə adlandırıblar.

Bizimyol.info xəbər verir ki, bu barədə Cənubi Koreya Xarici İşlər Nazirliyinin bəyanatında deyilir.

“Üç ölkənin nazirləri vurğuladılar ki, Rusiya Federasiyası ilə Şimali Koreya arasında hərbi əməkdaşlıq təkcə Koreya yarımadasında deyil, həm də planetdə sülh və sabitliyə ciddi təhlükə yaradır”, - deyə mətndə qeyd edilib. Tərəflər buna cavab olaraq “beynəlxalq ictimaiyyətlə” qarşılıqlı əlaqəni davam etdirəcəklərinə söz veriblər.

Üç ölkənin nümayəndələri KXDR-in aqressiv ritorikasını və təxribatçı hərəkətlərini pisləyib, eləcə də Koreya yarımadasının nüvəsizləşdirilməsinin zəruriliyini bəyan ediblər. Onlar Pxenyanın nüvə raket proqramını inkişaf etdirməsinə cavab olaraq üçtərəfli əməkdaşlığı gücləndirmək barədə razılığa gəliblər: “Üç dövlətin nazirləri əsas regional və qlobal problemlər, o cümlədən Ukraynadakı vəziyyət, həmçinin Yaxın Şərqdəki qeyri-sabitlik barədə fikir mübadiləsi aparıblar”, - deyə Seuldan məlumat verilib. Ço Tae-yeolun həmkarları ilə görüşü fevralın 22-də Rio-de-Janeyroda keçirilən G20 nazirlərinin görüşü çərçivəsində baş tutub.

Rusiya Xarici İşlər Nazirliyi dəfələrlə qeyd edib ki, Qərbin Rusiya ilə KXDR arasında qeyri-qanuni hərbi-texniki əməkdaşlıqla bağlı ittihamları əsassızdır. Rusiyanın xarici işlər naziri Sergey Lavrov bundan əvvəl Vaşinqtonun Pxenyanın Moskvaya hərbi yardım göstərməsi ilə bağlı iddialarını şayiələr adlandırmışdı.

Qadir, Bizimyol.info