İsrailin baş naziri Benyamin Netanyahu Beynəlxalq Cinayət Məhkəməsinin (BCM) özü də daxil olmaqla, yüksək vəzifəli İsrail rəsmilərinin həbsinə order verilməsini nəzərdən keçirməsini absurd adlandırıb.

Bizimyol.info xəbər verir ki, baş nazir bu barədə Amerikanın Merit Street Media telekanalına müsahibəsində deyib.

“Düşünürəm ki, bu absurddur. Bu sadəcə məhkəmənin təqlid edilməsidir. İsrailin liderlərini, komandirlərini və əsgərlərini müharibə cinayətlərinə görə mühakimə etmək bütün beynəlxalq hüquq ideyasını ələ salır”, - deyə o qeyd edib.

Bir gün əvvəl ABŞ Konqresinin Nümayəndələr Palatasının üzvü Rəşidə Tlaib BCM-ni Qəzza zolağında gedən döyüşlərlə bağlı Netanyahu da daxil olmaqla yüksək vəzifəli İsrail rəsmilərinin həbsinə order verməyə çağırıb.

Fələstin əsilli Tlaib İsrail hökumətini “Soyqırım cinayətinin qarşısının alınması və cəzalandırılması haqqında” Konvensiyanı pozmaqda ittiham edib. Eyni zamanda, "Zeteo" portalı mayın 7-də ABŞ-ın bir qrup respublikaçı senatorunun BCM-ni İsrail rəsmilərinin həbsinə order verəcəyi təqdirdə sanksiyalarla hədələdiyini bildirib.

Fevral ayında BCM-nin prokuroru Kərim Xan demişdi ki, agentlik Qəzzada mümkün cinayətləri fəal şəkildə araşdırır. O qeyd edib ki, dəfələrlə müharibə qanunlarına və adətlərinə riayət etməyə çağırıb, lakin hələ də İsrailin davranışında nəzərəçarpacaq dəyişiklik görməyib.

Aprel ayında Netanyahu BCM-nin ölkəsinə qarşı mümkün hərəkətləri ilə bağlı ilk rəsmi bəyanatını verərək, bu qurumun “İsrailin ayrılmaz özünümüdafiə hüququnu pozmaq” cəhdlərinə icazə verməyəcəyini vurğulayıb. Baş nazirin sözlərinə görə, İsrailin təmsil etdiyi “Yaxın Şərqdə yeganə demokratiyanın” hərbçilərinin və rəsmilərinin həbs təhlükəsi qlobal miqyasda “təhlükəli presedent yaradacaq”.

Bundan əvvəl İsrail televiziyasının 12-ci kanalı məlumat vermişdi ki, yəhudi dövlətinin hakimiyyət orqanları BCM-nin mümkün həbs orderlərinin verilməsindən ciddi qorxurlar. "Axios" portalının məlumatına görə, baş nazir bir neçə amerikalı senatorla söhbət edib və onlardan BCM prokuroruna təzyiq göstərməyi xahiş edib ki, o, həbs qərarlarının verilməsinə rəvanc verməsin.

İsrail BCM-nin üzvü deyil və onun yurisdiksiyasını qəbul etmir, lakin Fələstin 2015-ci ildə qəbul edilib, ona görə də məhkəmənin Fələstin ərazilərində hər hansı bir tərəfin törətdiyi cinayətlər üzərində yurisdiksiyası var.

Qadir, Bizimyol.info