Novruz tətilindən qayıdan vətəndaşlar aidiyyəti qurumların qəfil belə "sürpriz"i ilə rastlaşmalı olublar. Məsələn, Azadlıq Meydanı yaxınlığındakı yeraltı dayanacaqlarda 12 saatlıq parkinqin qiyməti yüz manatdır. Ən "ucuz" yerlərdə parkinqin bir saatlıq qiyməti 1 manatdan hesablanır.

Həqiqətən də ölkədə heç vaxt dəyişilməyən və daim özünü bir şəkildə doğruldan o ifadə - "Gələn, gedənə rəhmət oxutdurur" yenə də öz reallığını isbatladı. Bir zamanlar "parkovşik"lərin 30-40 qəpik almasından, bunun qanunsuz olmasından şikayətlənən vətəndaşlar indi bir saatlıq parkinq üçün bir manat ödəmək məcburiyyətində qalıblar.

Bəzi ərazilərdə tariflər ikiqat yüksəlib. Məsələn, Qış parkının dayanacaqlarında qiymətlər 12 saat üçün 30 yox, 60 manat olub. Ölkədə əməkhaqqının damcı-damcı, qram-qram artdığı, əksər vaxt da heç qalxmadığı, illərlə yerində saydığı bir vaxtda hələ yeni-yeni islahat işlərinə başlanılmış nəqliyyat-parkinq sahəsində qiymətlər bir anda iki qat yüksəlir. Aidiyyəti qurumun bu məsələyə reaksiyası, şərhi necə olacaq, hələlik bir söz demək çətindir, ancaq vəziyyət ondan xəbər verir ki, qaş düzəltmək istəyərkən, yenə vurub göz çıxarıblar.

Ölkədə nəyinsə qanuniləşdirilməsini, nizamlanmasını ürəklə qarşılamağa, səmimi qəlbdən sevinməyə qorxursan, ən azı, oturub bir ay vəziyyəti izləməlisən, görək, şoru çıxacaq, ya yox? Bu dəfə deyəsən, yenə şoru çıxıb...

Mətin Şükürlü, Bizimyol.info