Şimali Koreya lideri Kim Çen In təlimlərin keçirildiyi yerə baş çəkib və hərbçilərin döyüş hazırlığının yüksəldilməsi üçün səylərin intensivliyinin artırılması barədə göstəriş verib.

Bizimyol.info xəbər verir ki, bu barədə Koreya Mərkəzi Xəbər Agentliyi (KCNA) məlumat yayıb.

Kim Çen In martın 6-da Koreya Xalq Ordusunun ölkənin qərb hissəsindəki əməliyyat təlimləri üçün nəzərdə tutulmuş iri bazasına baş çəkib, burada təlim obyektlərinə baxış keçirib və hərbi hissələrin praktiki manevrlərinə nəzarət edib. Onu Şimali Koreyanın müdafiə naziri Kanq Sun Nam və Koreya Xalq Ordusunun Baş Qərargah rəisi Li Yonq Gil qarşılayıb.

“Düşmənlərin daimi təhlükəsini böyük qüvvə ilə saxlamaq, müharibəyə başlamaq üçün ən kiçik cəhdləri ardıcıl olaraq dəf etmək və fövqəladə hallar zamanı qarşıya qoyulan mühüm tapşırıqları dəqiqliklə yerinə yetirmək üçün ordumuz öz üzərinə ən sərt tələblər qoymalı, dəyişikliklərə və onun müasir formalarına uyğun olaraq döyüşə tam hazırlığı təmin etmək üçün döyüş hazırlığını tez bir zamanda təkmilləşdirmək üçün praktiki məşqləri daim artırmalıdır”, - deyə agentlik Kim Çen Inın çıxışından sitat gətirib.

"KCNA"nın məlumatına görə, o vurğulayıb ki, bütün səviyyələrdə silahlı qüvvələr mövcud vəziyyətə uyğun olaraq “müharibə hazırlığını sürətləndirmək”də yeni təlatümlü dövrə girməlidir. KXDR lideri təlimlərin keçirilməsindən də məmnunluğunu bildirib, əsgər və zabitlərin mənəvi-psixoloji vəziyyətini yüksək qiymətləndirib. Kim Çen In döyüş başlayarsa, “müharibədə qələbəni” təmin etmək üçün təlimlərin intensivlik səviyyəsinin artırılması vəzifələrini açıqlayıb.

Agentlik qeyd edib ki, poliqon təlimləri real şəraitə yaxın şəraitdə keçirməyə imkan verir. Martın 4-də Koreya Respublikası və ABŞ “Azadlıq Qalxanı” adlı genişmiqyaslı təlimlərə başlayıb.

Qadir, Bizimyol.info