Alman Aerokosmik Mərkəzində və Avropa Kosmik Agentliyində çalışan Fələstin əsilli, Qəzzadan olan mühəndis Sahba Əl-Şava Qəzzaya hücumlarda kosmos sənayesinin İsrailə hərbi dəstək verdiyini açıqlayıb.
Bizimyol.info xəbər verir ki, Beynəlxalq Kosmos Universitetində magistr təhsilini tamamlayan və İordaniya Kosmik Tədqiqat Təşəbbüsünün qurucusu olan Şava, İsrailə hərbi dəstək verməklə kosmos sənayesinin müharibə cinayətlərində iştirakını və sektordakı ikili standart rəftarı olduğunu bildirib.
Kosmik sənayenin vahid sənaye, kosmos və müdafiə kimi görüldüyünü qeyd edən Şava, İsrail ordusunun bu sektorun böyük bir hissəsini təşkil etdiyini və maliyyəsinin böyük hissəsinin hərbi təşkilatlardan gəldiyini bildirib.
Şava qeyd edib ki, ABŞ-da "Lockheed Martin", "The Boeing Company", "Raytheon", "Northrop Grumman Corporation" kimi şirkətlərin əksəriyyəti qazanclarının böyük hissəsini silah təchizatından əldə edirlər. "Bu kosmos bazarında şirkətlər özləri bəşəriyyətin inkişafı üçün çalışan təşkilatlar kimi fəaliyyət göstərirlər, lakin qazanclarının çoxu silah ticarətindən əldə edilir. Onlar silah və müdafiə sistemləri sataraq İsrail işğalını fəal şəkildə dəstəkləyirlər", - deyə o qeyd edib.
Sahba Əl-Şava ABŞ-ın İsrailə hər il milyardlarla dollar hərbi yardım etdiyini və Birləşmiş Millətlər Təşkilatının Təhlükəsizlik Şurasının Qəzzada təcili humanitar atəşkəs tələb edən qətnamə layihəsinə veto qoyduğunu xatırladıb və: "Qəzzada soyqırım başlayanda kosmos sektorundakı şirkətlərin səhmləri dərhal yüksəldi və hələ də yüksəlir. İqtisadi baxımdan Qəzzaya hücumların davam etməsindən qazanırlar. Beləliklə, bu, təkcə iqtisadi fayda verən bir ölkə kimi ABŞ üçün deyil, həm də kosmik sənaye üçün şəriklikdir”, - deyə qeyd edib.
Şava bildirib ki, Qəzzaya hücumların ilk günlərində peyk görüntülərindən dəymiş ziyanın ölçüsü, bombalanan ərazilər və İsrail tanklarının yerləri haqqında məlumat əldə etmək mümkün olub: “Bu şəkilləri təqdim edən şirkətlər daha sonra məlumatlara girişi məhdudlaşdırdılar. Onlar İsrail ordusunun törətdiyi hərbi cinayətləri gizlətməyə çalışırlar. Bu, İsrail işğalını qorumaq və insan hüquqları üçün vacib olan dəlillərə senzura tətbiq etmək formasıdır”, - deyə o bildirib.
Şava, ikili standart münasibətin kosmik sənayedə açıq şəkildə müşahidə oluna biləcəyini vurğulayıb.
“Niyə biz fələstinlilərə qarşı oxşar münasibət görmürük? İsrail Fələstin xalqına qarşı soyqırım törətdiyi bir vaxtda biz hələ də İsrail şirkət və təşkilatlarının kosmik sənayedə dəstəkləndiyini görürük. İştirak etdiyim bir çox kosmik konfranslarda İsrailin çox güclü olduğunu gördüm. Biz kosmos bütün bəşəriyyət üçündür desək də, kosmik sənaye İsrailin əslində silah istehsalçısı olan kosmos şirkətlərini vurğulayır”, - deyib.
Şava, kosmik sənayenin əslində müdafiə ilə iç-içə olduğuna diqqət çəkib: “Kimin kosmik sənayedə hansı səviyyədə işləyə biləcəyinə dair məhdudiyyətlər var. Çünki biz müstəmləkəçi təfəkkür və maraqların hökm sürdüyü bir dünyada yaşayırıq. Cənubdan gələn insanlara təhlükəsizlik təhdidləri kimi baxılır”, - deyə bildirib.
Qadir, Bizimyol.info
