Bizimyol.info xəbər verir ki, Azərbaycan İnternet Forumunun rəhbəri Osman Gündüz də mənzil satışında ciddi nöqsanların olduğunu hesab edir. Mütəxəssis bu barədə qeydlərini yazıb.

“Maraqlıdır ki, MİDA bu dəfə prosesi izləmək üçün yalnız dövlət sektorunun iştirakına üstünlük verib. Belə görünür ki, MİDA şəffaflıq və ictimai nəzarət imkanlarını tam minimuma endirib. Yenə də canlı yayım təşkil etməyib. Bu dəfə ilk mənzilin hansı müddətdə seçilməsi haqqında açıqlama olmayıb. Yenə də seçim prosesinin vahid bir ekrandan deyil, 30-40 ekrandan görüntüsü verilib. Hansı ki, bunun ictimai nəzarət və müşahidə baxımından hər hansı bir əhəmiyyəti yoxdur. Sistemin müstəqil auditinin fəaliyyəti dayandırıldıqdan sonra bu prosesi kimin icra etməsi açıqlanmayıb. Alternativ satışla bağlı hökümətin təşəbbüsləri haqqında məlumatlar yoxdur”.

Osman Gündüz yetərincə maraqlı məqamlara toxunub. Özəl sektor prosesdən kənarda qalır. Qətiyyən şəffaflıqdan söhbət gedə bilməz. MİDA istəsəydi, ictimaiyyətin şübhə içində qalmaması üçün uyğun şərait yaradardı. Adicə canlı yayımın təşkil olunması da rəva görülməyib. Sistemin auditinin təşkili havada qalıb. Bu şəraitdə hansı ədalətli satışdan danışıla bilər?!

Problem barədə daha aydın təsəvvür üçün sosial platformalarda yazılanları oxumaq kifayətdir. Sosial şəbəkə istifadəçisi Samirə Məmmədova yazır ki, onun mənzilə sahib olmuş tanışları proqramçının, informasiya texnologiyaları mütəxəssisinin köməyi ilə məqsədinə çatıb. Bu halda, ehtiyac olmadan mənzilə sahib çıxmaq imkanı qazanıblar. Samirə Məmmədova inanır ki, layihədə fırıldaq var. Şaiq Mehdiyev də əvvəllər boş yerə əziyyət çəkdiyini yazıb. Ötən satışda anlayıb ki, heç bir halda mənzil əldə edə bilməyəcək. Ümumiyətlə, rəylərin əksəri bu ruhdadır. İnsanlar MİDA-ya da, sistemin ədalətinə də inanmır. Proses şəffaf keçmir. Aşkar görünür ki, mənzillər məhz evə ehtiyac duyanlar üçün nəzərdə tutulmayıb. Hər dəfə eyni reaksiyalar olur, amma sistem dəyişmir ki, dəyişmir.