"Atəşkəs çağırışı üçün Qəzzaya daha neçə ton bombanın düşməsi və daha neçə uşağın ölməsi lazımdır?"
Bizimyol.info xəbər verir ki, Türkiyə Prezidenti Rəcəb Tayyib Ərdoğan Beştəpədə 8-ci Ailə Şurasında tədbirində İsrailin Qəzzaya hücumlarına dünyanın əsas güc mərkəzlərindən və beynəlxalq təşkilarlardan reaksiya gəlmədiyi ilə bağlı açıqlama verib.
"Oktyabrın 7-dən bəri amansız qətliam həyata keçirilir. Mən xüsusilə qlobal icmalara müraciət edirəm; Məscidlər, kilsələr, bazarlar, xəstəxanalar İsrail tərəfindən bombalanır. Bu günə qədər Qəzza və Ramallaha edilən hücumlarda 6 mindən çox insan şəhid olub. 17 min adam yaralanıb. Mühasirəyə alınmış 360 kvadrat kilometrlik ərazidə sağ qalmaq üçün mübarizə aparan 2 milyon insanın başına 12 min tondan çox bomba atılıb. ABŞ oradadır, Avropa bütün imkanları ilə oradadır. Bir-bir gəlib ziyarət edirlər", - deyə Ərdoğan qeyd edib.
Prezident qeyd edib ki, ailə institutunu gözləyən təhlükələrə diqqət çəkdik. "İnşallah bütün ziyalı cəmiyyətlərin dəstəyi ilə bu mübarizəni qlobal miqyasda davam etdirəcəyik. Qlobal vicdanın hərəkətə keçməli olduğu digər sahə Qəzzadır.
Qəzzaya baxıb reaksiyasız qalmaq olarmı? Heç bir hərəkət belə vəhşiliyə haqq qazandırmaz. Ən acınacaqlısı odur ki, özünü mədəni göstərən mədəniyyətsiz insanlar sadəcə seyr edirlər. Aİ komissiyası deyir ki, biz hələlik atəşkəsə çağıra bilmərik. Daha neçə uşaq ölməlidir? Hesabınızın nə olduğunu bizə bildirin; Atəşkəs nə vaxt olacaq? Mən 40 ildir siyasətdəyəm, amma biz heç vaxt sizin kimi bu vəhşiliklərə durub baxmamışıq", - deyə bildirib.
Türkiyənin dövlət başçısı deyib ki, bütün Qərb ölkələri hücumlara qeyd-şərtsiz dəstək verir. "İnsan haqlarını mühakimə edənlər 19 gündür Qəzzanın yaşamaq hüququna məhəl qoymurlar. Ümumdünya insan hüquqları bəyannaməsinə nə oldu? Orada yazılanlara baxmırsınız? Onlar özlərinə uyğun gələndə baxırlar, işə yaramayanda isə baxmırlar. Çünki axan qan müsəlman qanıdır. Yardım gəmisi yerinə təyyarədaşıyan gəmi göndərməklə hansı lobbilərə xidmət etdiklərini göstərdilər. Buna ikiüzlülük deyilir. Atəşkəs çağırışı üçün Qəzzaya daha neçə ton bomba düşməlidir?
Hər bir günahsız insanın məsuliyyəti, bomba atanlar qədər, tərəddüdlü davranışları ilə buna imkan verənlərin də üzərinə düşür. Məhəl qoymayanlar Qəzzadakı vəhşiliyə şərik olurlar. Biz bunu qəbul etmirik. Bizim prinsipimiz burada aydındır. Haqsızlığa reaksiya verməyən insan lal iblisdir. Tək olsaq da, həqiqəti, hayqırmaqdan çəkinməyəcəyik. Sahə xəstəxanalarının yaradılmasından tutmuş, yaralıların ölkəmizə gətirilməsinə qədər hər cür yardıma hazırıq. Şərait yetişəndə gəmilərimizi bölgəyə göndərəcəyik", - deyə o qeyd edib
"İkinci Dünya Müharibəsində yəhudi alimləri dəstəklədiyimiz və Ukrayna vətəndaşlarına kömək etdiyimiz kimi, bu gün Qəzza böhranında yeganə kompasımız vicdan və mərhəmətdir. Bizim üçün Qəzzalı uşaqlarla İsrailli uşaqlar arasında heç bir fərq yoxdur. Uşaq bütün kimliklərindən asılı olmayaraq uşaqdır. Uşaqlar öldürülərkən susmağın utancını heç kim bizə yaşada bilməz. Heç kim bizim susmağımızı gözləyə bilməz. Əvvəla, vicdanımız belə vəhşiliyə qarşı susmağa imkan verə bilməz", - deyə Prezident bildirib.
Qadir, Bizimyol.info
