Prezident Ersin Tatar Birləşmiş Millətlər Təşkilatını (BMT) Fələstindəki vəziyyətlə bağlı hərəkətə keçməyə çağırıb. O: "Ancaq BMT bu gün Fələstinə nə qədər müdaxilə edə bilərlər? Bununla bağlı şübhələrimiz var. Düşünürəm ki, bu qədər uşağın qətlə yetirildiyi bir mühitdə Birləşmiş Millətlər Təşkilatının burada nə etdiyini soruşmaq bizim haqqımızdır".

Bizimyol.info xəbər verir ki, bu barədə Şimali Kipr Türk Cümhuriyyəti (ŞKTC) Prezidentinin mətbuat xidməti məlumat yayıb.

Qeyd edilir ki, fevralın 6-da Kahramanmaraşda baş verən zəlzələdə həyatını itirən 49 ŞKTC vətəndaşı üçün Altındağ Bələdiyyəsi və ŞKTC Ankara səfirliyi tərəfindən "Şimali Kipr Türk Cümhuriyyəti Parkı və Kipr Şəhidləri Xatirə Meşəsi"ndə ağac əkilməsi tədbirinə qatılan Tatar, Fələstin haqqında da danışıb.

Prezident Fələstində baş verənləri qınadığını vurğulayıb: "Orada günahsız dinc əhalinin və uşaqların qətlə yetirilməsinə heç bir vicdan dözə bilməz. Ona görə də burada olduğu kimi Kiprdə də 3 günlük matəm elan etdik. 3 gün yas saxlamaqla Fələstində baş verənlərə hiddətimizi bildirdik",- deyə o qeyd edib.

Fələstində hadisələrin hələ də davam etdiyinə və bunun heç vaxt məqbul bir hadisə olmadığına diqqət çəkən Tatar, bütün dünya dövlətlərinin bunu pisləməyə başladığını diqqətə çatdırıb.

Prezident Tatar, ŞKTC-nin illər əvvəl bu ağrıları yaşadığı halda, BMT və digər beynəlxalq təşkilatların bu hadisələrə seyirci qaldığını bildirib və BMT-ni yenidən hərəkətə keçməyə çağırıb. BMT-nin ŞKTC-də Xovlu Yolda onlarla qarşılaşdığını ifadə edən Tatar: “Bəs bu gün Fələstinə nə qədər müdaxilə edə bilərlər? Şübhə etdiyimiz budur. Düşünürəm ki, bu qədər uşağın qətlə yetirildiyi bir mühitdə Birləşmiş Millətlər Təşkilatının nə etdiyini soruşmaq haqqımız var”, - deyib.

Qadir, Bizimyol.info