“2020-ci il Dağlıq Qarabağ müharibəsindən bəri bölgəyə Rusiya sülhməramlıları yerləşdirilib. BMT sülhməramlılarının Dağlıq Qarabağa göndərilməsi ideyası real deyil, regionda sülhün və təhlükəsizliyin bərpası vəzifəsini Rusiya sülhməramlı kontingenti effektiv şəkildə həll edir”.

Bizimyol.info xəbər verir ki, bunu  Rusiya Xarici İşlər Nazirliyinin Beynəlxalq Təşkilatlar Departamentinin direktoru Pyotr İliçev RİA Novosti-yə müsahibəsində deyib.

O qeyd edib ki, beynəlxalq və xarici təşkilatlardan yalnız Beynəlxalq Qızıl Xaç Komitəsi hələ də “Dağlıq Qarabağ”da işləyir və “BMT-nin humanitar qurumları azərbaycanlılardan və ermənilərdən anklava daxil olmaq, hətta ilkin ehtiyacları həyata keçirmək üçün icazə almayıb”.

İliçevin fikrincə, “çətinliklər tərəflərlə bərabər məsafəli mövqe tuta bilməməsinin siyasi səbəbi, o cümlədən regiona giriş-çıxış, hesabatların verilməsi, nəzarət və humanitar fəaliyyətlərin qurulmasının hüquqi əsasları ilə əlaqədar yaranır”.

“Bu şəraitdə Dağlıq Qarabağa hətta beynəlxalq humanitar yardımın yaradılmasında heç bir irəliləyiş yoxdur, beynəlxalq sülhməramlı kontingentin göndərilməsi ideyasının praktiki həyata keçirilməsi real deyil.

Biz bildiririk ki, Rusiya sülhməramlı kontingenti Dağlıq Qarabağda sülhün və təhlükəsizliyin bərpası ilə bağlı bütün vəzifələrin öhdəsindən səmərəli şəkildə gəlir”, - deyə o, əlavə edib.

Bundan başqa, rusiyalı diplomat əlavə edib ki, BMT Təhlükəsizlik Şurasının mandatı altında yerləşdirilən sülhməramlı missiyalar həmişə ev sahibi dövlətlərin etimadını qazanmır.

"Bəzi hallarda aşağı effektivliyə görə "Mavi Dəbilqələr"in geri çəkilməsinin tərəfdarıdırlar. Ona görə də məsələ sülhməramlı əməliyyata kimin icazə verməsində deyil, daha çox münaqişənin hər iki tərəfində onun dayandırılmasında xoş niyyətin olması və onun nəticələrinin aradan qaldırılmasıdır”, - deyə İliçev bildirib.

Xatırladaq ki, Ermənistanın baş naziri Nikol Paşinyan yanvarın əvvəlində bildirib ki, Rusiya sülhməramlılarının Qarabağdakı mandatı başa çatdıqdan sonra BMT Təhlükəsizlik Şurasına regiona beynəlxalq sülhməramlı kontingentin göndərilməsi ilə bağlı sorğu gələ bilər.

Ermənistan baş nazirinin sözlərini şərh edən Rusiya prezidentinin mətbuat katibi Dmitri Peskov isə deyib ki, beynəlxalq sülhməramlılar münaqişənin bütün tərəflərinin razılığı ilə Qarabağda işə cəlb oluna bilər.

Qeyd edək ki, Rusiya Federasiyasının sülhməramlı kontingenti 2020-ci ilin noyabrında Rusiya Federasiyası, Ermənistan və Azərbaycan liderləri arasında üçtərəfli razılaşmalar nəticəsində Qarabağa yerləşdirilib. Sənədə əsasən, Rusiya sülhməramlılarının qalma müddəti, əgər tərəflərdən heç biri buna etiraz etməsə, avtomatik olaraq növbəti beş il müddətinə uzadılmaqla beş ildir.

Leyla Mirzə