ABŞ Prezidenti Co Baydenin Rusiyanın dövlət başçısı Vladimir Putin haqqındakı açıqlamasından sonra ölkənin Vaşinqtondakı fövqəladə və səlahiyyətli səfiri Anatoli Antonov Moskvaya çağırılıb.

“Qafqazinfo” xəbər verir ki, bunu Rusiya XİN-in sözçüsü Mariya Zaxarova açıqlayıb.

“Səfir fikir mübadiləsi və ABŞ-la münasibətlərdə nələr ediləcəyini, haraya gediləcəyini təhlil etmək üçün Moskvaya çağırılıb”, - Baydenin Rusiya liderini “ABŞ seçkilərinə müdaxiləyə görə “cəza çəkəcəyini” söyləməsi barədə yazılı açıqlamasında M.Zaxarova deyib.

“Bayden administrasiyası 100 günü yaxında tamamlayır. Bu da Bayden komandasının hansı mövzularda qənaətbəxş olub-olmadığını təhlil etmək üçün səbəbdir”, - Zaxarova əlavə edib.

Rusiya XİN sözçüsü vurğulayıb ki, Vaşinqtonun son illər gərginləşdirdiyi və gərgin olan Rusiya-ABŞ münasibətlərini düzəltmək üçün yolların müəyyənləşdirilməsi vacibdir:

“Əgər amerikalılar bununla bağlı risklərin fərqindədirlərsə, əlaqələrin geri dönüşü olmayan şəkildə pozulmasını əngəlləməkdə maraqlıyıq. Bu məsələlər barədə XİN-dəki və digər əlaqədar qurumlardakı müzakirələrdə səfirlə fikir mübadiləsi aparılacaq”.