ABŞ Prezidenti Donald Tramp ölkəsinin, o cümlədən hava hücumundan müdafiə (HHM) raketləri üzrə sursat çatışmazlığı səbəbindən İrana qarşı genişmiqyaslı hərbi əməliyyatları bərpa etməkdən imtina etdiyi barədə yayılan məlumatları təkzib edib.

Bizimyol.info xəbər verir ki, bu barədə "The Wall Street Journal" qəzeti məlumat yayıb.

"Nəinki bizə lazım olandan, hətta dünyanın istənilən ölkəsindən də qat-qat çox sursatımız var", – deyə Tramp nəşrə açıqlamasında bu iddiaları şərh edib.

İyulun 25-də "The New York Times" qəzeti mənbələrə istinadən yazmışdı ki, ABŞ prezidenti Yaxın Şərqdə yerləşdirilən "Patriot" HHM sistemləri üçün raket-açkarlayıcı və digər hava hücumundan müdafiə vasitələrinin sursat ehtiyatlarının daha da azalmasının qarşısını almaq məqsədilə İrana qarşı hərbi əməliyyatların genişləndirilməsini təxirə salıb.

Məlumata görə, iyulun 24-də keçirilən müşavirədə ABŞ Silahlı Qüvvələrinin Qərargah Rəisləri Komitəsinin sədri Den Keyn bildirib ki, hərbi komandanlıq İrana qarşı genişmiqyaslı əməliyyatları yenidən başlada bilər. Lakin bu halda "Patriot" sistemləri üçün raket-tutucu ehtiyatları təhlükəli həddə qədər azala bilər.

ABŞ-İran qarşıdurmasının növbəti mərhələsi iyulun 8-də başlayıb. ABŞ Silahlı Qüvvələri Vaşinqton və Tehran arasında imzalanmış memorandumdan sonra ilk dəfə olaraq Hörmüz boğazında ticarət gəmisinə hücuma cavab olduğunu bildirdiyi əsasla İran ərazisinə bir neçə silsilə zərbə endirib.

Həmin gün Donald Tramp İranla qüvvədə olan atəşkəsin başa çatdığını elan edib. Buna cavab olaraq Tehran Bəhreyn, İordaniya, Qətər, Küveyt, BƏƏ və Omanda yerləşən ABŞ hərbi obyektlərinə zərbələr endirməyə başlayıb. İyulun 24-də isə tərəflər qarşılıqlı hücumları dayandırıblar.

Bizimyol.info