Ölkə əhalisinin artmaması Avropada adi hal alıb. Köhnə qitənin bəzi dövlətlərində artım olsa da, cüzi dərəcəsi qeydə alınır. Azərbaycan da bu ölkələrin sırasına qoşulub. Əhali artımı bir az da yavaşlayıb.

Bizimyol.info bir müddət əvvəl ilin ilk yarısında doğum göstəricilərinin xeyli aşağı olması barədə yazmışdı. Orada qeyd olunmuşdu ki, 6 ay ərzində artım uzağı 11,5 min nəfər ola bilər. Çünki aylıq doğum göstəricisi 7 min nəfərə çatmır. Ölənlərin sayı isə 5 min nəfəri keçir. Son statistika da göstəricinin təxminən belə ola biləcəyini ortaya qoyub. Hətta ilin ilk yarısının statistikasında daha aşağı rəqəmlər görə bilərik. Görünür, ölənlərin sayı daha çox olur.

Dövlət Statistika Komitəsinin məlumatına görə, ilin ilk beş ayı ərzində ölkə əhalisinin sayı 9 min 287 nəfər artıb. Rəsmi hesabatda 0,1 faiz artım qeydi olsa da, əslində, göstərici bura çatmayıb. Əhalinin iyunun 1-nə olan ümumi sayı 10 milyon 271 min 638 nəfərdir.

Məlumata görə, ölkə əhalisinin 54,3 faizini şəhər, 45,7 faizini kənd sakinləri, 50,2 faizini qadınlar, 49,8 faizini isə kişilər təşkil edir.

Göstərici təxmin olunandan da aşağıdır. Aylıq artım 1800 nəfərdən bir qədər çox olur. Əvvəlki illərlə müqayisə edəndə sürətin necə azaldığını müşahidə etmək mümkündür. 2000-ci ildən bəri illik artım göstəricilərini nəzərinizə çatdırırıq:

2000-ci il 70293

2001-ci il 65072

2002-ci il 64193

2003-cü il 64466

2004-cü il 82041

2005-ci il 89939

2006-cı il 96698

2007-ci il 98308

2008-ci il 99376

2009-cu il 99625

2010-cu il 112063

2011-ci il 122310

2012-cu il 119452

2013-cü il 118288

2014-cü il 114855

2015-ci il 111513

2016-cı il 102816

2017-ci il 86932

2018-ci il 81732

2019-cu il 85263

2020-ci il 50924

2021-ci il 35406

2022-ci il 62036

2023-cü il 52470

2024-cü il 43401

2025-ci il 36041

Göründüyü kimi, ölkəyə neft pullarının çox gəldiyi illərdə əhali artımı indeksi yüksəlib. Devalvasiyadan sonra isə azalma tendensiyası başlayıb. Son illərdə xüsusilə geriləmişik. Bu ildən heç danışmağa dəyməz. 2011-2012-ci illərdə əksər hallarda aylıq artım 10 min nəfəri keçirdi. İndi heç beş aya o göstəriciyə yetişmək olmur. Ölkə əhalisinin sayı 10,3 milyon nəfərə heç cür çatmır. Belə görünür, hələ gələn ilin sonuna qədər də alınmayacaq.

Aytən, Bizimyol.info