ABŞ-da federal prokuror kimi fəaliyyətə başlayan Rocer Roqoffun vəzifədə qalma müddəti cəmi bir saat çəkib.
Bizimyol.info xəbər verir ki, ilk əməkdaş iclasını gözlədiyi vaxt ona prezident Donald Trampın qərarı ilə işdən çıxarıldığını bildirən şok məktub göndərilib.
Roqoffun andiçmə mərasimindən bir neçə dəqiqə sonra baş verən bu qeyri-adi hadisə prezident hakimiyyətinin sərhədləri və məhkəmələrin səlahiyyətləri ilə bağlı hüquqi mübahisələrdə yeni cəbhə açıb. Federal prokuror vəzifəsinə təyinat prosesi misli görünməmiş siyasi qarşıdurma meydanına çevrilib.
Hadisələr iyulun 15-də səhər saatlarında Sietldəki federal məhkəmədə başlayıb. Vaşinqton ştatının Ali Məhkəməsinin keçmiş hakimi və uzun illər prokuror kimi çalışmış Rocer Roqoff dairə hakimlərinin yekdil dəstəyindən sonra Vaşinqtonun Qərb dairəsi üzrə federal prokuror vəzifəsinə and içib.
Lakin prokurorluqda əməkdaşlarla ilk görüşünü gözləyərkən Roqoff Tramp administrasiyası tərəfindən elektron poçtla göndərilən bildiriş vasitəsilə vəzifəsindən azad edildiyini öyrənib.
Baş prokuror vəzifəsini müvəqqəti icra edən Todd Blanş administrasiyanın mövqeyini “X” sosial şəbəkəsində açıqlayıb. O bildirib ki, dairə məhkəmələrinin hakimləri müvəqqəti federal prokuror təyin edə bilər, lakin prezident onları vəzifədən azad etmək hüququna malikdir.
Blanş həmçinin qeyd edib ki, Vaşinqtonun Qərb dairəsinin hakimləri seçilən federal prokurorun Ədliyyə Nazirliyində işləmək üçün administrasiyanın tələblərinə uyğun olmasını təmin etmək məqsədilə hökumətlə məsləhətləşmə ənənəsindən imtina ediblər.
Roqoff bu vəzifəyə Çarlz Nil Floydun müvəqqəti federal prokuror kimi 120 günlük səlahiyyət müddəti başa çatdıqdan sonra təyin olunub. Floydun mandatı fevral ayında sona çatmışdı.
Onun dərhal işdən çıxarılması Ağ Ev ilə federal dairə məhkəmələri sistemi arasında artan qarşıdurmanı daha da kəskinləşdirib. Tərəflər ABŞ Ədliyyə Nazirliyinin yüksək vəzifəli şəxslərinin müvəqqəti təyinatları ilə bağlı hüquqi mövqelərinin düzgün olduğunu müdafiə edirlər.
Hazırda bu hadisə Tramp administrasiyası ilə onun siyasətinə qarşı çıxan bölgələrdəki hüquqi institutlar arasında artan gərginliyin növbəti mərhələsi kimi qiymətləndirilir.
Bizimyol.info
