“Azərbaycanın Avropa Şurasından mümkün çıxışı həm beynəlxalq hüquq müstəvisində, həm də Cənubi Qafqazın geosiyasi arxitekturasında yeni bir mərhələnin başlanğıcı kimi qiymətləndirilməlidir. Bakının bu addımı nəzərdən keçirməsi emosional bir qərar deyil, beynəlxalq hüququn fundamental prinsipləri və milli suverenliyin qorunması zərurətindən doğan legitim bir reaksiyadır. Çünki BMT Nizamnaməsinin 2-ci maddəsinin 7-ci bəndində təsbit olunmuş dövlətlərin daxili işlərinə qarışmamaq prinsipi və Helsinki Yekun Aktının suveren bərabərlik prinsipləri kontekstində yanaşdıqda, Avropa Şurası Parlament Assambleyasının Azərbaycana qarşı tətbiq etdiyi sanksiyalar və qərəzli qətnamələr, ilk növbədə, təşkilatın öz nizamnamə məqsədlərinə ziddir”.
Bu barədə Bizimyol.info xəbər portalına Milli Məclisin deputatı Bəhruz Məhərrəmov danışıb.
O bildirib ki, Azərbaycan 2023-cü ildə öz suveren ərazilərində antiterror tədbirləri həyata keçirərək BMT Təhlükəsizlik Şurasının dörd qətnaməsini müstəqil şəkildə icra edib və beynəlxalq səviyyədə tanınmış sərhədləri daxilində hüququn aliliyini təmin edib. Beynəlxalq hüququn bu ali prinsiplərinin reallaşdırılmasından sonra Bakıya qarşı siyasi təzyiqlərin artması təşkilatın qərarlarının hüquqi deyil, selektiv və siyasi xarakter daşıdığını sübut edir.
“Azərbaycan Konstitusiyasının 2-ci və 6-cı maddələrinə əsasən, suverenliyin yeganə mənbəyi Azərbaycan xalqıdır və heç bir beynəlxalq qurum dövlətin öz ərazi bütövlüyünü təmin etmək hüququnu məhdudlaşdıra bilməz.
Hüquqi nöqteyi-nəzərdən Avropa Şurasından çıxmaq İnsan Hüquqları üzrə Avropa Konvensiyası sistemindən və Avropa İnsan Hüquqları Məhkəməsinin yurisdiksiyasından ayrılmaq deməkdir. Lakin bu status de-fakto olaraq ölkə daxilində insan hüquqlarının müdafiəsi standartlarının zəifləməsi mənasına gəlmir. Belə ki, Azərbaycan Konstitusiyasının III fəsli insan və vətəndaş hüquq və azadlıqlarının geniş spektrini birbaşa təsbit edir və milli qanunvericilik təməl hüquqları qorumaq iqtidarındadır. Üstəlik, AİHM-in bir çox qərarlarının digər üzv dövlətlər tərəfindən də siyasi alətə çevrilməsi və milli konstitusiya məhkəmələrinin qərarları ilə, məsələn, Almaniya və ya vaxtilə Böyük Britaniya təcrübəsində olduğu kimi, toqquşması beynəlxalq hüquq mütəxəssisləri tərəfindən tez-tez tənqid olunur. Bakının bu təsisatdan uzaqlaşması daxili hüquq sisteminin daha da müstəqilləşməsinə və xarici siyasi təzyiqlərdən izolyasiya olunmasına şərait yaradacaq.
Siyasi-hüquqi müstəvidə isə bu addım Azərbaycanın Avropa İttifaqı kimi digər təsisatlarla ikitərəfli, bərabərhüquqlu və iqtisadi-strateji maraqlara əsaslanan münasibətlərinə xələl gətirmir. Çünki Avropa Şurası çoxtərəfli siyasi platformadır, lakin Bakının Qərb tərəfdaşları ilə münasibətləri regional enerji təhlükəsizliyi və logistika kimi daha möhkəm və rasional əsaslara söykənir”, – deyə deputat bildirib.
Deputat vurğulayıb ki, regionda Ermənistanın 30 illik işğalına göz yuman, lakin ədalət bərpa olunduqdan sonra sanksiya dilinə əl atan bu təsisatın obyektivliyinin tamamilə sarsıldığı şəraitdə Azərbaycanın Avropa Şurasından mümkün çıxışı geosiyasi baxımdan Cənubi Qafqazda formalaşan yeni reallıqların və Bakının balanslaşdırılmış xarici siyasətinin məntiqi nəticəsidir. Bakı bu qərarla Qərb mərkəzli institutların birtərəfli diktəsini qəbul etməyəcəyini, beynəlxalq münasibətlər sistemində regional sahiblik prinsipini üstün tutduğunu nümayiş etdirir. Bu regional balans çərçivəsində Azərbaycan Qoşulmama Hərəkatı, Türk Dövlətləri Təşkilatı və BRICS+ kimi yeni qlobal güc mərkəzləri ilə inteqrasiyasını gücləndirərək çoxvektorlu xarici siyasətini daha da diversifikasiya edir.
“Azərbaycanın beynəlxalq hüquqa və suveren bərabərliyə əsaslanan ədalətli mövqeyi onu beynəlxalq təzyiqlərə boyun əyməyən müstəqil güc mərkəzi kimi formalaşdırır və Avropa Şurasından mümkün çıxış strateji bir itki deyil, Bakının milli maraqlarını qlobal diktatdan üstün tutmasının hüquqi və siyasi təzahürüdür. Bu mənada əminliklə demək mümkündür ki, Prezident İlham Əliyevin Şuşa Qlobal Media Forumunda ifadə etdiyi qətiyyətli mövqe Azərbaycanın milli maraqlarının beynəlxalq müstəvidə qorunmasının ali hüquqi və siyasi manifestidir”, – deyə Bəhruz Məhərrəmov bildirib.
O deyib ki, dövlət başçısının Avropa Şurası ilə münasibətlərin yenidən qiymətləndirilməsi və təşkilatdan tam çıxmaq ehtimalının nəzərdən keçirilməsi barədə bəyanatı Bakının suveren hüquqlarından və milli təhlükəsizlik prioritetlərindən heç bir halda güzəştə getməyəcəyini nümayiş etdirməklə yanaşı, ölkənin daxili hüquq sisteminin xarici siyasi diktələrdən qorunmasını və regional geosiyasi balansda Azərbaycanın heç bir güc mərkəzinin iradəsinə tabe olmayan qətiyyətli statusunu daha da möhkəmləndirir.
İradə Cəlil, Bizimyol.info
