Ukraynada atəşkəs rejimi əldə olunduqdan sonra 25-dən çox ölkə beynəlxalq sülhməramlı missiyada iştirak etmək üçün hərbi kontingent göndərməyə hazırdır.

Bizimyol.info xəbər verir ki, bu barədə Böyük Britaniyanın Baş naziri Kir Starmer Parisdə keçirilən "İstəklilər Koalisiyası"nın iclasından sonra açıqlama verib.

Starmerin sözlərinə görə, müttəfiqlər çoxmillətli sülhməramlı qüvvələrin yaradılması ilə bağlı ətraflı plan hazırlayıblar. Bu qüvvələrin atəşkəs qüvvəyə mindikdən sonra bir neçə gün ərzində Ukraynaya yerləşdirilməsi nəzərdə tutulur.

Britaniya hökumətinin başçısı bildirib ki, tərəfdaş ölkələr Ukrayna üçün hüquqi baxımdan məcburi qüvvəyə malik daha geniş təhlükəsizlik təminatları paketi üzərində də razılığa gəliblər. Onun sözlərinə görə, bu planlar hələ yanvar ayında Parisdə keçirilən görüş zamanı hazırlanmağa başlanıb və o vaxtdan bəri əhəmiyyətli dərəcədə irəliləyiş əldə olunub.

Starmer vurğulayıb ki, müttəfiqlər Ukraynaya hərbi dəstəyi bundan sonra da artırmaq niyyətindədir. Bu çərçivədə hava hücumundan müdafiə vasitələrinin istehsalının sürətləndirilməsi, mövcud ehtiyatlardan əlavə silahların verilməsi və Ukraynanın müdafiə texnologiyalarının inkişafına dəstəyin davam etdirilməsi planlaşdırılır.

Baş nazir eyni zamanda Rusiyaya qarşı sanksiya təzyiqinin gücləndirilməsinə, ədalətli və davamlı sülhün təmin olunması istiqamətində səylərin davam etdirilməsinə, eləcə də Ukraynaya etibarlı təhlükəsizlik təminatlarının verilməsinə çağırıb.

Starmer qeyd edib ki, cəbhədəki vəziyyətin dəyişməsi Rusiyanı müharibənin onun üçün ciddi problemlər yaratdığını etiraf etməyə məcbur edib. Bununla yanaşı, o vurğulayıb ki, Moskvanın eskalasiya təhdidlərinə baxmayaraq, müttəfiqlər Ukraynaya dəstəkdən geri çəkilməyəcəklər.

Kir Starmer üçün "İstəklilər Koalisiyası"nın bu iclası baş nazir vəzifəsində son görüş olub. O, növbəti Britaniya hökumətinin də Ukraynaya dəstək siyasətini davam etdirəcəyinə əmin olduğunu bildirib.

Bizimyol.info