Çinin cənubunda baş verən güclü daşqınlar bioloji təhlükə ilə bağlı fövqəladə vəziyyət yaradıb.

Bizimyol.info xəbər verir ki, “Reuters” agentliyinin məlumatına görə, Quanşi-Çjuan muxtar rayonunda sel suları yerli ixtisaslaşmış ilan fermalarının mühafizə qurğularını dağıdıb.

Hadisə nəticəsində fermalardan təxminən 1000 ilan qaçıb. Qaçan sürünənlər arasında insan həyatı üçün təhlükəli zəhərli növlərin, o cümlədən kobraların da olduğu bildirilir.

Daşqınlar fermaların istehsal sahələrini tamamilə su altında qoyub və bu, işçilərin ilanların qarşısını vaxtında almasına imkan verməyib.

Çinin yerli xilasetmə xidmətləri və ekoloji qurumları qaçan ilanların axtarışı və tutulması üçün xüsusi əməliyyata başlayıb.

Ətraf ərazilərin sakinlərinə ehtiyatlı olmaq, qoruyucu vasitələr olmadan su basmış yerlərə yaxınlaşmamaq və aşkar edilən ilanlar barədə dərhal fövqəladə xidmətlərə məlumat vermək tövsiyə olunub.

Bölgəyə zəhərli sürünənlərin təhlükəsiz şəkildə tutulması üçün xüsusi avadanlıqla təchiz edilmiş əlavə xilasedici və herpetoloq qrupları göndərilib.

Hazırda Quanşi rayonunun su basmış ərazilərində axtarış-xilasetmə tədbirləri sutka ərzində davam etdirilir.

Bizimyol.info