Rusiyada artan yanacaq qıtlığı fonunda gərginlik yüksəlsə də, Kreml vəziyyəti nəzarət altında saxlamağa çalışır. Prezident Vladimir Putin Ukraynanın neft emalı infrastrukturuna endirdiyi zərbələrə baxmayaraq, ölkədəki yanacaq böhranını “kritik deyil” kimi qiymətləndirir və müharibənin davam edəcəyini bildirir.
Bizimyol.info xəbər verir ki, verilən məlumata görə, mart ayından bu yana Rusiyada və işğal altındakı Krımda neft emalı zavodlarına 50-dən çox hücum həyata keçirilib. Bu zərbələrin nəticəsində ölkənin emal gücünün təxminən üçdə birinin sıradan çıxdığı bildirilir. Yanacaq istehsalının azalması bir sıra bölgələrdə ciddi problemlərə səbəb olub: yanacaqdoldurma məntəqələrində uzun növbələr yaranıb, bəzi yerlərdə isə satışlar məhdudlaşdırılıb.
Xüsusilə Krımda vəziyyət daha ağırdır — bölgədə yanacaq satışı bəzi dövrlərdə tam dayandırılıb. Rusiya hökuməti problemi yumşaltmaq üçün aşağı keyfiyyətli benzin istehsalına icazə verib və hətta gələcəkdə idxal ehtimalını da nəzərdən keçirir.
Eyni zamanda, müharibə cəbhəsində gərginlik davam edir. Vladimir Zelenski administrasiyası Rusiyanın enerji obyektlərinə zərbələri müharibənin gedişinə təsir göstərmək və Moskvanı danışıqlara məcbur etmək məqsədi daşıdığını bildirir. Rusiya isə bu hücumları Ukraynanın daxili problemlərdən diqqəti yayındırmaq cəhdi kimi təqdim edir.
Böhranın fonunda Rusiya ordusu Ukrayna şəhərlərinə, xüsusilə Kiyevə ağır hücumlar həyata keçirib. Son genişmiqyaslı raket və dron hücumu nəticəsində onlarla mülki şəxs həyatını itirib. Münaqişənin humanitar nəticələri ilə bağlı narahatlıqlar isə beynəlxalq ictimaiyyət tərəfindən davamlı şəkildə vurğulanır. BMT-nin məlumatlarına görə, müharibə nəticəsində minlərlə ukraynalı mülki şəxs həlak olub.
Moskva isə eyni zamanda sanksiyalar, enerji infrastrukturu zərbələri, həmçinin hərbi xərclərin artması fonunda iqtisadi və logistika təzyiqləri ilə üz-üzə qalıb. Buna baxmayaraq, Kreml atəşkəs təkliflərini rədd edir və müharibəni “məqsədlər əldə olunana qədər” davam etdirəcəyini bildirir.
Beləliklə, həm cəbhədə, həm də iqtisadi sahədə gərginlik artdıqca, Rusiyanın Ukraynada beşinci ildir ki, davam edən müharibəsi yeni mərhələyə daxil olur və qarşılıqlı zərbələr regionda sabitliyi daha da zəiflədir.
Qadir, Bizimyol.info
