Son illərdə "healing" (“şəfa verən”, “sağaldan”) romanlar narahatlıq yaradan gündəmdən və emosional gərginlikdən uzaqlaşmaq istəyən oxucular arasında ən populyar ədəbi janrlardan birinə çevrilib. Bu əsərlərin əsas xüsusiyyətləri sakit süjet, rahat və isti ab-hava, xeyirxah obrazlar və oxucunu gündəlik qayğılardan müvəqqəti uzaqlaşdıran hekayələrdir.

Bbizimyol.info xəbər verir ki, bu cür ədəbiyyata maraq təkcə oxucu zövqü ilə deyil, elmi araşdırmalarla da təsdiqlənir. Böyük Britaniyanın London Fənlərarası Məktəbi və Niderlandın Radboud Universitetinin Dil Araşdırmaları Mərkəzinin alimləri bədii ədəbiyyatın insanın emosional vəziyyətinə təsirini araşdırıblar.

Alimlər müəyyən ediblər ki, bədii əsərlərin oxunması insanın əhvalını və psixoloji rifahını yaxşılaşdıra bilər. Lakin bu təsir dərhal deyil, müəyyən vaxt keçdikdən sonra – oxucu oxuduqlarını mənimsədikdə və qəhrəmanlarla birlikdə hadisələri emosional şəkildə yaşadıqda özünü göstərir.

Tədqiqat müəlliflərinin fikrincə, bədii ədəbiyyat empatiya hissini gücləndirir, emosional təcrübələrin işlənməsinə kömək edir və insanın öz problemlərinə fərqli rakursdan baxmasına imkan yaradır. Buna görə də kitablar psixoloji sağlamlığın qorunmasına dəstək verən vasitələrdən biri hesab oluna bilər.

Oxunuşdan psixoloji dəstək məqsədilə istifadə edən biblioterapiya sahəsinin mütəxəssisləri də oxşar nəticələrə gəliblər. Elmi araşdırmaların icmallarına əsasən, düzgün seçilmiş bədii ədəbiyyat narahatlıq səviyyəsini azaltmağa, stressin təsirlərini yüngülləşdirməyə və emosional vəziyyəti yaxşılaşdırmağa kömək edir. Bununla belə, alimlər vurğulayırlar ki, biblioterapiya psixoterapiyanı və ya tibbi müalicəni əvəz etmir, yalnız psixi sağlamlığın qorunmasına dəstək verən əlavə üsul kimi qiymətləndirilir.

Məhz buna görə də son illərdə "healing" romanların populyarlığı sürətlə artır. Gərgin süjetli əsərlərdən fərqli olaraq, bu kitablar emosional yüklənməyə səbəb olmur. Oxucu dramatik hadisələr əvəzinə sadə insan münasibətləri, kiçik kafelər, kitab mağazaları, gül dükanları, ailə ənənələri və daxili harmoniya axtarışından bəhs edən hekayələrə qərq olur.

Psixoloqlar qeyd edirlər ki, bu tip kitablar ciddi psixoloji problemləri aradan qaldırmasa da, keyfiyyətli yuxu, fiziki aktivlik, istirahət və yaxınlarla ünsiyyət kimi gündəlik özünəqayğının vacib hissəsinə çevrilə bilər. Məhz buna görə "healing" romanlar getdikcə daha çox insan tərəfindən özünə kiçik bir “zehni detoks” etmək üçün ən əlçatan vasitələrdən biri kimi qiymətləndirilir.

Bizimyol.info