Vladimir Zelenski Ukraynanın Rusiyanın hərbi məqsədlərlə istifadə etdiyi obyektlərə preventiv zərbələr endirəcəyini bəyan edib.

Bizimyol.info xəbər verir ki, bu barədə o, axşam müraciətində bildirib.

Prezident qeyd edib ki, Kiyev Rusiyanın hərbi əməliyyatlarını genişləndirdiyi obyektlərə qarşı qabaqlayıcı tədbirlər görəcək. Onun sözlərinə görə, bu barədə xüsusi xidmət orqanlarına və silahlı qüvvələrə müvafiq tapşırıqlar verilib.

“Xüsusi xidmət orqanlarına və Silahlı Qüvvələrə Rusiyanın hərbi əməliyyatlarını genişləndirmək üçün istifadə etdiyi obyektlərə qarşı preventiv tədbirlər görməyi tapşırmışam”, – deyə Zelenski bildirib.

Xatırladaq ki, çərşənbə günü Ukrayna pilotsuz uçuş aparatları Rusiya tərəfindən işğal olunmuş Krımda şəhərin ən böyük elektrik təminatını kəsib, həmçinin Rusiya ərazisinin mərkəzi və cənub bölgələrində bir sıra obyektlərə zərbələr endirib. Eyni zamanda, Ukraynanın neft emalı zavodları və enerji infrastrukturuna hücumları nəticəsində Rusiyada yanacaq qıtlığı dərinləşib.

Mənbələrin məlumatına görə, Moskva neft emalı zavodu Ukrayna dronlarının ciddi zərbələrindən sonra ən azı altı ay fəaliyyətini dayandıra bilər. Bu isə ölkədə yanacaq çatışmazlığının aradan qaldırılması cəhdlərini daha da çətinləşdirir.

Eyni zamanda, Rusiya statistikasına əsasən, may ayında neft məhsulları və koks istehsalı ötən ilin eyni dövrü ilə müqayisədə 13,5 faiz azalıb. 2022-ci ildə Ukraynaya qarşı genişmiqyaslı müharibəyə başladıqdan sonra Rusiya neft hasilatı və ixracına dair bir çox rəsmi məlumatların açıqlanmasını məhdudlaşdırıb.

Son aylarda Ukrayna Silahlı Qüvvələri Rusiya ordusunun peyk rabitə infrastrukturuna zərbələr endirməkdə də fəallaşıb. Məqsəd Rusiya Silahlı Qüvvələrinin istifadə etdiyi geostasionar rabitə sistemlərinin fəaliyyətini zəiflətməkdir.

Məlumatlara görə, Ukrayna qüvvələri artıq Rusiyada iki kosmik rabitə mərkəzinə – Moskva vilayətində “Dubna” və Vladimir vilayətində “Vladimir” obyektlərinə dəqiq zərbələr vurub.

Bəzi media orqanları isə Ukrayna hücumlarının intensivləşməsi fonunda Rusiyada Dövlət Dumasına seçkilərin təxirə salınması və ya ləğvi ilə bağlı müzakirələrin başladığını yazır.

Bizimyol.info