Almaniyanın keçmiş kansleri Olaf Şolz ölkənin inkişaf etməkdə olan dövlətlərlə əlaqələrini gücləndirməyə yönəlmiş yeni “Şimal–Cənub” komissiyasına həmsədrlik edəcək.

Bizimyol.info xəbər verir ki, bu barədə “Der Spiegel” məlumat yayıb.

Almaniya hökumətinin çərşənbə günü keçirilən iclasında yaradılması təsdiqlənən komissiya “qlobal Cənub” ölkələri ilə əməkdaşlığın gələcək istiqamətlərini müəyyənləşdirməyi hədəfləyir. Şolz bu vəzifəni Kosta-Rikanın keçmiş prezidenti Laura Çinçilla ilə birlikdə icra edəcək.

Planlara əsasən, komissiya 2028-ci ilin sonunadək Almaniyanın inkişaf siyasətinə dair geniş hesabat və tövsiyələr hazırlayacaq. Almaniyanın iqtisadi əməkdaşlıq və inkişaf naziri Reem Alabali-Radovan bildirib ki, bu komissiya müxtəlif sahələri — siyasət, elm, biznes, həmkarlar ittifaqları və vətəndaş cəmiyyətini bir araya gətirəcək.

Rəsmi açıqlamalara görə, əsas məqsəd Almaniyanın qlobal Cənub ölkələri ilə tərəfdaşlığını gücləndirmək, dəyişən dünya nizamına uyğun yeni əməkdaşlıq modeli formalaşdırmaqdır. Nazir vurğulayıb ki, dünya artıq çoxqütblü sistemə doğru dəyişir və Almaniya bu prosesdə fəal rol oynamaq istəyir.

Komissiyanın təxminən 20 üzvdən ibarət olması planlaşdırılır. Onların arasında həm qlobal Cənubdan, həm də Şimaldan nümayəndələr yer alacaq.

Yeni qurumun ideyası tarixi bir təcrübəyə əsaslanır. 1977–1983-cü illərdə Almaniyanın keçmiş kansleri Villy Brandt tərəfindən rəhbərlik edilən əvvəlki “Şimal–Cənub” komissiyası dünya miqyasında iqtisadi bərabərsizlikləri araşdıraraq mühüm hesabatlar hazırlamışdı.

Rəsmilər hesab edirlər ki, yeni komissiya bu tarixi irsi davam etdirərək Almaniyanın qlobal siyasətdə rolunu daha da gücləndirilməsinə xidmət edəcək.

Bizimyol.info