Böyük Britaniyada hakim Leyborist Partiyasında baş nazir Kir Starmerə qarşı təzyiqlər güclənib. Partiyanın bir sıra kabinet üzvləri və nüfuzlu siyasətçiləri Starmerdən yaxın günlərdə istefa üçün vaxt cədvəli açıqlamağı tələb edirlər.

Bizimyol.info xəbər verir ki, təzyiqlərin artmasına səbəb Makerfield dairəsində keçirilən əlavə seçkilərdə Endi Börnhemin inamlı qələbəsi olub. Partiya daxilində Börnhemin yaxın həftələrdə baş nazir postuna əsas namizəd kimi önə çıxacağı gözlənilir. Leyborist deputatlarından birinin sözlərinə görə, zərurət yaranarsa, təxminən 200 deputat onun namizədliyini dəstəkləməyə hazırdır.

Starmer isə geri çəkilmək niyyətində olmadığını bildirib. O, kabinet üzvləri ilə keçirdiyi danışıqda liderlik uğrunda mübarizəni davam etdirəcəyini vurğulayıb. Baş nazir jurnalistlərə açıqlamasında “Əgər liderlik yarışı olsa, namizədliyimi verəcəyəm” deyib.

Bununla belə, partiya daxilində bir çox siyasətçi hesab edir ki, rəhbərlik dəyişikliyi qaçılmazdır. Keçmiş nazirlər Ed Miliband, Şabana Mahmud, həmçinin Leyboristlərin tanınmış simaları Devid Blankett və Harriyet Harman yeni lider seçkisi üçün konkret vaxt müəyyənləşdirilməsinin vacibliyini bildiriblər.

Starmerə yaxın çevrələr isə onun hələ də kifayət qədər dəstəyə malik olduğunu iddia edir. Baş nazirin tərəfdarları mümkün liderlik yarışına hazırlıq məqsədilə artıq kampaniya planları üzərində işləyir və maliyyə dəstəyi toplayırlar.

Eyni zamanda, partiya daxilində Darren Cons və Ues Stritinq kimi digər mümkün namizədlərin də adı hallanır. Analitiklər hesab edirlər ki, yaxın günlər Leyborist Partiyasının gələcək lideri məsələsində həlledici olacaq.

Bizimyol.info