ABŞ prezidenti Donald Trampın xüsusi nümayəndəsi Stiv Vitkoff İran nümayəndə heyəti ilə keçirilməsi planlaşdırılan mühüm danışıqlarda iştirak etmək məqsədilə İsveçrəyə yollanıb. Trampın kürəkəni və yaxın müşaviri, iş adamı Cared Kuşnerin isə artıq İsveçrədə olduğu bildirilir.

Bizimyol.info xəbər verir ki, məlumatı "Axios" portalının tanınmış jurnalisti Barak Ravid öz mənbələrinə istinadən yayıb. O, "X" sosial şəbəkəsində paylaşdığı məlumatda bildirib ki, Vaşinqton və Tehran arasında nüvə proqramı ilə bağlı mümkün razılaşmanın müzakirəsi üçün ilk raund danışıqların yaxın saatlarda başlanacağı gözlənilir.

“ABŞ rəsmisinin sözlərinə görə, Ağ evin xüsusi nümayəndəsi Stiv Vitkoff İsveçrəyə gedir. Orada İranın nüvə proqramı ilə bağlı potensial saziş üzrə danışıqların ilk mərhələsinin keçirilməsi planlaşdırılır”, — deyə Ravid qeyd edib.

Jurnalist əlavə edib ki, Tramp administrasiyasına yaxın fiqurlardan biri hesab olunan Cared Kuşner artıq İsveçrəyə çatıb və prosesdə qeyri-rəsmi vasitəçi kimi iştirak edə bilər.

Qeyd olunur ki, tərəflər arasında əsas müzakirə mövzusu İranın nüvə fəaliyyətinin məhdudlaşdırılması müqabilində sanksiyaların yumşaldılması ola bilər. Diplomatik mənbələr danışıqların son aylarda regionda artan gərginlik fonunda xüsusi əhəmiyyət daşıdığını vurğulayırlar.

Hələlik nə Ağ ev, nə də İran tərəfi görüşlə bağlı rəsmi açıqlama yayıb. Bununla belə, beynəlxalq müşahidəçilər İsveçrədə planlaşdırılan təmasları Vaşinqton və Tehran arasında münasibətlərin yumşaldılması istiqamətində mühüm addım kimi qiymətləndirirlər.

Bizimyol.info