İsrailin milli təhlükəsizlik naziri İtamar Ben-Qvir son çıxışında ölkənin təhlükəsizlik siyasətini kəskin tənqid edərək Livana qarşı daha sərt və qəti addımlar atılmasına çağırıb. O bildirib ki, İsrail vətəndaşlarının və İsrail Müdafiə Ordusunun (IDF) əsgərlərinin təhlükəsizliyi bütün xarici siyasət və beynəlxalq öhdəliklərdən üstün olmalıdır.

Bizimyol.info xəbər verir ki, Ben-Qvirin sözlərinə görə, hazırkı Yaxın Şərq şəraitində tətbiq edilən “təhlükəni cilovlama” və dözümlülük siyasəti gözlənilən nəticəni vermir və qarşıdurmanı yalnız uzadır. O, baş naziri strategiyanı dəyişməyə çağıraraq terror təşkilatlarına qarşı kompromissiz addımların vacibliyini vurğulayıb.

“Yaxın Şərqdə yumşaq reaksiyalarla qalib gəlmək olmur — sərt davranmaq, məhv etmək və terroru məğlub etmək lazımdır”, – deyə nazir bildirib.

İsrailli nazir həmçinin ölkəsinin digər dövlətlərin, o cümlədən ABŞ-ın mövqeyindən asılı olmadan hərəkət etməli olduğunu deyib və milli təhlükəsizliyin heç bir kompromis mövzusu ola bilməyəcəyini vurğulayıb.

Onun bu çağırışları İsraildə Livanın şimalından gələn təhlükələrə, xüsusilə “Hizbullah”ın regiondakı təsirinə qarşı necə cavab verilməsi ilə bağlı davam edən siyasi müzakirələrin bir hissəsi kimi qiymətləndirilir.

Ben-Qvirin fikrincə, İsrail elə bir strategiya seçməlidir ki, düşmən ölkə hər hansı düşmənçilik hərəkətinin qiymətini ödəməyə məcbur olsun.

Bizimyol.info