ABŞ vitse-prezidenti Ceyms Devid Vens İranla müharibənin dayandırılması üçün əldə olunan ilkin razılaşmanın əsas müdafiəçilərindən birinə çevrilib. Xarici hərbi müdaxilələrə skeptik münasibəti ilə tanınan Vens indi prezident Donald Tramp administrasiyasının Tehranla əldə etdiyi memorandumun ictimai siması kimi çıxış edir.
Bizimyol.info xəbər verir ki, əslində Vensin bu həftə yeni kitabının təqdimatı ilə məşğul olması planlaşdırılırdı. Lakin diqqətlər əsasən ABŞ və İran arasında əldə olunan razılaşmaya yönəlib. Vitse-prezident son günlər ardıcıl müsahibələr verərək sənədi uğurlu addım adlandırıb və razılaşmanı müdafiə edən video müraciət yayımlayıb.
Vensin cümə günü İsveçrəyə gedərək İranla danışıqların yeni mərhələsinə start verməsi gözlənilir. O, ilkin olaraq rəsmi imzalanma mərasimində iştirak etməli idi, lakin Tramp sənədi çərşənbə günü imzalayıb.
ABŞ prezidenti jurnalistlər qarşısında çıxışı zamanı razılaşmanın uğursuz olacağı təqdirdə məsuliyyəti Vensin üzərinə atacağını zarafatla dilə gətirib: “Əgər hər şey yaxşı getsə, uğuru mən götürəcəyəm. Əks halda isə Ceyms Devidi günahlandıracağam”.
Ağ Ev isə Vensi prezidentin “sağ əli” və milli təhlükəsizlik komandasının mühüm üzvü kimi təqdim edib. Bildirilib ki, o, xüsusi nümayəndə Steve Vitkoff və iş adamı Jared Kuşner ilə birlikdə danışıqlarda əsas fiqurlardan biri olub.
Bununla yanaşı, razılaşma həm demokratlar, həm də respublikaçılar arasında ciddi narazılıq yaradıb. Tənqidçilər hesab edir ki, sənəd İran üçün öncədən güzəştlər nəzərdə tutur, lakin Tehranın nüvə proqramının məhdudlaşdırılması ilə bağlı konkret təminatlar vermir.
Respublikaçı senator Ted Kruz razılaşmanı sərt tənqid edərək Trampın “yanlış məsləhətlər aldığını” bildirib. Digər senator Lindsey Qraham isə Vensi “razılaşmanın memarı” adlandırıb.
Vens isə tənqidlərə cavab olaraq bildirib ki, İran öhdəliklərini yerinə yetirməsə, heç bir üstünlük əldə etməyəcək. O, həmçinin İran münaqişəsinin İraq müharibəsinə çevrilməyəcəyini vurğulayıb.
Siyasi müşahidəçilər hesab edirlər ki, Vensin İran razılaşmasındakı rolu onun 2028-ci il prezident seçkiləri üçün siyasi gələcəyinə birbaşa təsir göstərə bilər.
Bizimyol.info
