Oksford Universitetinin alimləri kvant mexanikası haqqında anlayışımızı dəyişdirə və daha möhkəm kvant kompüterlərinin yaradılmasını asanlaşdıra biləcək yeni bir kvant superpozisiyası növü hazırlayıblar.

Bizimyol.info xəbər verir ki, tədqiqatın nəticələri “Physical Review X” jurnalında dərc olunub.

Alimlər bu yanaşmanı məşhur “Şrödinger pişiyi” adlı düşüncə eksperimenti əsasında hazırlayıblar. Bu konsepsiyaya görə, kvant obyektləri müşahidə olunana qədər eyni anda bir neçə vəziyyətdə mövcud ola bilər.

Yeni araşdırmada tədqiqatçılar ənənəvi yanaşmadan fərqli olaraq klassik komponentlər əvəzinə artıq mövcud olan qeyri-klassik kvant vəziyyətlərindən istifadə ediblər. Bunun üçün onlar tək bir tutulmuş ion üzərində təcrübə apararaq onu həm kvant biti, həm də kvant harmonik osillyatoru kimi istifadə ediblər.

Tədqiqatın aparıcı müəllifi, doktor Sebastian Saner bildirib ki, bu üsul kvant superpozisiyalarının formasını demək olar ki, istənilən şəkildə dəyişməyə imkan verir. Alimlər kvant vəziyyətlərinin ölçüsünü, istiqamətini və komponentlər arasındakı məsafəni idarə edərək müxtəlif yeni superpozisiya formaları yaradıblar.

Ölçmələr kvant interferensiyasına xas olan və klassik fizika ilə izah oluna bilməyən nəticələri təsdiqləyib. Bu isə yaradılan vəziyyətlərin həqiqətən yeni tip kvant halları olduğunu göstərir.

Alimlərin fikrincə, bu kəşf gələcək kvant kompüterlərinin inkişafında mühüm rol oynaya bilər. Belə vəziyyətlər səhvlərə daha davamlı ola və məlumatların korreksiyasını daha effektiv edə bilər.

Tədqiqatçılar həmçinin hesab edirlər ki, bu nəticələr klassik və kvant dünyası arasındakı sərhədin daha yaxşı anlaşılmasına imkan yaradacaq.

“Biz hələ bu vəziyyətlərin həm tətbiqi texnologiyalar, həm də fundamental elm üçün hansı imkanlar açdığını anlamağa yeni başlayırıq”, - deyə layihənin rəhbərlərindən biri, doktor Raqhavendra Şrinivasan qeyd edib.

Bizimyol.info