ABŞ Prezidenti Donald Tramp bildirib ki, İran heç vaxt nüvə silahına sahib olmamağa razılaşıb.

Bizimyol.info xəbər verir ki, o, bu barədə məlumatı özünün "Truth Social" sosial şəbəkə hesabında paylaşaraq bunu Vaşinqton və Tehran arasındakı münasibətlərdə mühüm nailiyyət adlandırıb.

Amerika mediasının məlumatına görə, Trampın açıqlaması ABŞ və İran arasında bazar günü imzalanmış anlaşma memorandumu ilə bağlıdır. Sənədə əsasən, İran tərəfi nüvə silahı hazırlamamaq və əldə etməmək öhdəliyini götürür. Bununla belə, Tehran uzun illərdir bəyan edir ki, onun nüvə proqramı yalnız dinc məqsədlərə xidmət edir. Oxşar öhdəliklər İran tərəfindən 2015-ci il razılaşması çərçivəsində də qəbul edilmişdi, lakin Tramp administrasiyası 2018-ci ildə həmin sazişdən çıxmışdı.

Tramp həmçinin ABŞ-nin İrana 300 milyon dollar ödəyəcəyi barədə yayılan məlumatları təkzib edib və bunu Demokrat Partiyasının yaydığı “yalan xəbərlər” adlandırıb. Bununla belə, onun bir köməkçisi daha əvvəl jurnalistlərə bildirmişdi ki, Vaşinqton Tehranla sanksiyaların yumşaldılması, dondurulmuş aktivlərin açılması və nüvə proqramı üzrə əlavə güzəştlər müqabilində ölkənin bərpası üçün fond yaradılması imkanlarını müzakirə edib.

Hər iki tərəf memorandumu diplomatik uğur kimi təqdim etməyə çalışır. Trampın yüksəkvəzifəli köməkçisinin sözlərinə görə, sənədin mətni yaxın 24–48 saat ərzində dərc oluna bilər. ABŞ vitse-prezidenti Ceyms Devid Vens isə gecikmənin əldə olunan razılaşmaların texniki icra məsələlərinin razılaşdırılması ilə bağlı olduğunu bildirib.

Bizimyol.info