Sergey Lavrovdan "bir köynək üstün" təfəkkür...

Ukrayna sülh danışıqları üçün Rusiya rəsmiləri Alyaska ştatına gəlib. Xarici mediada yayılan iddialara əsasən Rusiya Xarici İşlər naziri Sergey Lavrovun üzərində “SSRİ” yazılmış köynək geyindiyi görüntülənib. Görüntülər iddialara zəmin yaradıb. Ən azından "CC" hərflərini görmək mümkündür. Geyimin üzərində yazılan ifadənin mütləq "SSRİ" olduğuna əmin olmaq üçün köynəyin tam görüntüsünü görməyə ehtiyac var...

Ümumiyyətlə, Sergey Lavrovun "qanlı" köynəyində nə yazıldığını bilməyə ehtiyac varmı? Təbii ki, siyasi arenada bu cür detallar hər zaman maraq doğurur. Geyinilən köynək, taxılan saat, oğurlanan qələm... Siyasətçilərin və ya siyasi arenada xüsusi ad daşıyan şəxslərin geyimləri də, davranışları da, dedikləri də həmişə diqqət mərkəzində olur.

Sergey Lavrov o köynəyi təsadüfi, yoxsa bilərəkdən geyinib? Bu da ayrı bir sual. Bəs əsas sual budurmu? Cavablanmalı olan sual Lavrovun köynəyindəki yazıdırmı? Alyaskanın "zirvə"sində, beynəlxalq ictimaiyyətin diqqət mərkəzində Lavrovun köynəyi olmalıdırmı? "İnsanı geyiminə görə qarşılayıb, ağlına görə yola salarlar" deyimi tam da yerinə düşdü. Geyimi gördük. Bəs ağıl? Bu geyimi geyinmək nə dərəcədə "ağıllı" seçimdir? Keçmiş, bitmiş, batmış, dağılmış, yox olmuş imperiyanın "qanlı" köynəyini özü ilə daşımaq... Xatirələri yaşatmaqdır, yoxsa onu yenidən diriltmək arzusu? Və bu arzu nə dərəcədə mümkündür? Bu da ayrı bir sual.

"Bir köynək üstün"... Belə bir deyim var. Lavrovdan "bir köynək üstün" təfəkkür, yanaşmaya ehtiyac duyur Dünya. Ukraynada qətliama, soyqırıma məruz qalan xalq Lavrovun köynəyindəki yazı ilə maraqlanmır. Heç Rusiyanın özündə övladları "könüllü" və ya məcburi cəbhəyə göndərilən valideynlər də Lavrovun köynəyində yazılan 4 hərfli sözlə maraqlanmır. Onlar "Beyrəyin qanlı köynəyi"ni görmək istəmirlər. Övladı ölüb, ya sağdır? Budur onları maraqlandıran. Həm Ukraynada, həm də Rusiyada. Haqsız, ədalətsiz, qanlı, itkili müharibədən əziyyət çəkən hər iki xalq Lavrovun köynəyindəki yazıya əhəmiyyət vermir. Onlar ölkənin və cəbhədəki övladın alnındakı yazıya baxır. Onlar gələcəyə baxır, gələcək isə Lavrovun köynəyi kimi ağ görünmür...

Dünyanın hazırda yaşadığı real vəziyyətə "bir köynək üstün" təfəkkürlə yanaşaq. Sergey Lavrovdan gözlənti geyindiyi köynəyin rəngi və ya onun üzərindəki yazını açıqlaması deyil. Xaricə səfər edən bu nazirin "əliboş" qayıtmamasını gözləyir, insanlar. Əlində "qanlı köynək" əvəzinə atəşkəs sənədi gözləyir, eyni soydan olan xalqların hər bir fərdi.

"Söz vardır, kəsdirər başı,

Söz vardır, kəsər savaşı"...

Sergey Lavrovun köynəyində yazılan sözdən asılı deyil, sülh. Sergey Lavrovun deyəcəyi sözlərdən asılıdır. O da kiminsə sözün deyəcək, ya öz sözün... Nəticədə Federativ Respublikanın rəsmi "sözçü"sünün deyəcəyi bir söz iki qardaş ölkəni ya sülhə aparacaq, ya da müharibənin növbəti mərhələsinə. Addım-addım... Növbəti addım nə olacaqsa, bircə sözdən asılı olacaq. O söz hər nədirsə, köynəkdə deyil, ürəkdədir...

Orxan Musabəyli

Orxan Musa, Bizimyol.info