ABŞ dövlət katibi Marko Rubio Rusiya xarici işlər naziri Sergey Lavrovla telefon danışığında Amerikanın Ukraynada sülh yolu ilə nizamlanması planını müzakirə edib.

Bizimyol.info xəbər verir ki, bu barədə ABŞ Dövlət Departamentinin mətbuat xidmətinin rəhbəri Temmi Bryus danışıqlardan sonra verdiyi yazılı açıqlamada bildirib.

“Katib Rubio mayın 16-da İstanbulda Rusiya-Ukrayna danışıqları zamanı əldə edilən məhbus mübadiləsi razılaşmasını alqışlayıb və ABŞ prezidenti Donald Trampın sərt mesajını çatdırıb: Birləşmiş Ştatlar Rusiya-Ukrayna müharibəsinin davamlı sona çatmasını istəyir. Birləşmiş Ştatların təklif etdiyi hərtərəfli sülh planı irəliyə doğru ən yaxşı yolu təmsil edir”, - deyə diplomat qeyd edib.

“Dövlət katibi Prezident Trampın dərhal atəşkəs və sülh çağırışını qeyd edib”, - deyə Bruce bildirib.

Rusiya Xarici İşlər Nazirliyinin daha əvvəl bildirdiyi kimi, mayın 17-də Amerika tərəfinin təşəbbüsü ilə Lavrovla Rubio arasında telefon danışığı olub. Rusiyalı nazir “son nəticədə Kiyevin Rusiya prezidenti Vladimir Putinin İstanbul danışıqlarını bərpa etmək təklifini qəbul etməsinə köməklik göstərən ABŞ-ın müsbət rolunu qeyd edib” və həmçinin Moskvanın bu kontekstdə amerikalı həmkarları ilə birgə işləməyə hazır olduğunu bildirib.

Mayın 16-da İstanbulda Rusiya ilə Ukrayna arasında danışıqlar olub. Görüşdən sonra Moskva və Kiyev “1000-in 1000-ə” düsturuna əsasən əsirləri dəyişdirmək, mümkün gələcək atəşkəs barədə öz baxışlarını təqdim etmək, onu ətraflı şəkildə şərh etmək və danışıqlar prosesini davam etdirmək barədə razılığa gəliblər. Rusiya nümayəndə heyətinin rəhbəri, prezidentin köməkçisi Vladimir Medinski bəyan edib ki, Rusiya tərəfi görüşün nəticəsindən razıdır.

Qadir, Bizimyol.info