Ərəb Liqasının liderləri Bağdadda keçirilən 34-cü sammitin yekunlarına dair bəyanatda Qəzza zolağında hərbi əməliyyatların dayandırılmasını və ora humanitar yardımların çatdırılmasının bərpa olunması çağırışı ediblər.

Bizimyol.info xəbər verir ki,  bu barədə sənəddən çıxarışlar İraqın İNA xəbər agentliyi tərəfindən yayılıb.

“Biz fələstinliləri zorla köçürmək cəhdlərini qətiyyətlə rədd edirik və hesab edirik ki, humanitar yardım təcili olaraq Qəzzaya çatdırılmalıdır. Biz beynəlxalq ictimaiyyəti anklavda axan qanı dayandırmaq üçün İsrailə təzyiq göstərməyə çağırırıq”, - deyə Ərəb Liqası ölkələrinin başçıları qeyd ediblər.

Bağdad toplantısının iştirakçıları həmçinin Qəzza ilə sərhəddə "bütün keçidlərin açılması üçün əlaqələndirilmiş fəaliyyətin" vacibliyini vurğulayıblar və martın 4-də Ərəb Liqasının fövqəladə sammitində təsdiqlənən və sonradan İslam Əməkdaşlıq Təşkilatı tərəfindən dəstəklənən Zolağın yenidən qurulması planını dəstəkləyirlər.

Martın 2-də İsrailin baş naziri Benyamin Netanyahu Qəzza zolağına humanitar yardımın dayandırıldığını və bütün keçid məntəqələrinin bağlandığını elan edib.

İsrail tərəfinin fikrincə, bu, Fələstinin HƏMAS hərəkatının ABŞ-ın xüsusi elçisi Stiven Vitkoffun anklavda atəşkəsin uzadılması ilə bağlı planını qəbul etməkdən imtina etməsi səbəbindən edilib.

Martın 18-də İsrail ordusu Qəzza zolağında hərbi əməliyyatları bərpa edərək, ona qarşı kütləvi zərbələr endirib və bununla da bu ilin yanvarında yaradılmış atəşkəsi pozub.

Qadir, Bizimyol.info