Yeni Suriya rəhbərliyinin nümayəndələri ilə İsrailin nümayəndələri yaxın zamanlarda Azərbaycanda birbaşa danışıqlar aparıblar.

Bizimyol.info xəbər verir ki, bu barədə CNN-ə məlumat verən İsrail mənbələri bildirib.

İsrail tərəfdən danışıqlarda, İsrail Müdafiə Qüvvələrinin əməliyyat idarəsinin rəisi, general-mayor Oded Basyuk iştirak edib. Həmçinin görüşdə Türkiyənin nümayəndələri də yer alıb və bu dialoq formatı gizli saxlanılıb.

CNN-in sorğusuna cavab olaraq, İsrail Müdafiə Qüvvələri bildirib ki, heç bir nümayəndə Suriya ilə birbaşa danışıqlar aparmayıb, amma Azərbaycanda belə bir görüşün olub-olmaması barədə şərh verməkdən imtina ediblər.

Suriya tərəfi bildirilir ki, "Avraam Sazişləri"nə qoşulmağa maraq göstərir — bu, İsrail ilə ərəb ölkələri arasında münasibətlərin normallaşmasını nəzərdə tutan beynəlxalq təşəbbüsdür. "The Media Line" xəbər verir ki, Suriya prezidenti Əhməd əş-Şaraa artıq razılaşmanın ilkin strukturunu təsdiqləyib, bu struktur aşağıdakılardan ibarətdir: İsrail və Suriyanın suverenliyini qarşılıqlı tanımaq; rəsmi diplomatik əlaqələr qurmaq; səfirlikləri açmaq; hərbi əməliyyatları rəsmi şəkildə dayandırmaq.

Mənbələrin sözlərinə görə, əş-Şaraa Suriyanı təcrid vəziyyətindən çıxarmaq və "yeni bir sülh və inkişaf dövrü açmaq" zəruriliyini vurğulayıb.

Bildirilir ki, Birləşmiş Ərəb Əmirlikləri İsrail və Dəməşq arasında ayrı bir ehtiyat əlaqə kanalı yaradıb.

Yeni diplomatik fəaliyyət dalğası, ABŞ prezidenti Donald Trampın, Əş-Şara ilə Fars körfəzi ərəb dövlətləri əməkdaşlığı şurasının sammitinə hazırlıq olaraq Ər-Riyad şəhərində görüşdüyü bir dövrə təsadüf edir.

Qadir, Bizimyol.info