Hər dəfə boşanmaların sayı açıqlananda cəmiyyət buna böyük təəssüf hissi ilə reaksiya verir. Məsələ telakanallarda müzakirə olunmağa başlayır, sosial mediada bu istiqamətdə paylaşımların çoxluğu diqqət çəkir. İnsanlar boşanmaların sayının artmasını faciə kimi qiymətləndirir. Əksəriyyət müasir insanın doğru yolda olmadığını düşünür.
Bizimyol.info xəbər verir ki, 2025-ci ilin ilk iki ayı ərzində ölkədə 3414 nikahın pozulması halı qeydə alınıb. Keçən illə müqayisədə ciddi fərq gözə dəymir. Amma son illərin ən yüksək göstəricilərindən biri rəsmiləşib.
Azərbaycanda boşanmaların sayı həqiqətən də çoxdurmu? Təsəvvür edin, 1999-cu ildə əhalinin hər 1000 nəfərinə düşən boşanma indeksi 0,6 olub, indi isə 2,1-dir. Yəni 2,5 dəfə artımdan söhbət gedir. 2011-ci ildən artım başlayıb və yalnız çoxalma müşahidə edilir. 2023-cü ildən etibarən göstərici 2-dən aşağı düşmür. Azərbaycanda yalnız İkinci Dünya Müharibəsindən əvvəl oxşar mənzərə olub.
Başqa ölkələrlə müqayisə bizə analiz üçün daha çox kömək edə bilər. Bizim cəmiyyətdə belə fikir var ki, Qərb dövlətlərində vəziyyət daha acınacaqlıdır. Lakin Norveçdə əhalinin hər 1000 nəfərinə düşən boşanma indeksi 1,5-dir. Avstriya, Yunanıstan, Xorvatiya, İslandiya, Niderland, Polşa, Rumıniya, Portuqaliya, Slovakiya, İspaniya, Serbiya və Sloveniyada 2-yə çatmır. İrlandiyada, ümumiyyətlə, hər 1000 nəfərə heç 1 boşanma düşmür.
Biz hələ çox ölkənin adını yazmadıq. Latın Amerikasında boşanmaların sayına görə bizdən geri qalmağı bacarmış dövlət az deyil. Qonşu ölkələrdən yalnız Rusiyada daha çox boşanma var.
Cəmiyyətin narahatlığı əbəs deyilmiş. Sayın belə sürətlə artması ailə institutunun sarsılması anlamına gəlir. Burada sosial-iqtisadi amillər ciddi rol oynayır. Digər yandan ailə planlamasının olmaması, fundamental məsələlərə ciddi yanaşılmaması özünü göstərir. İnsanlar evliliyin necə böyük məsuliyyət gətirdiyini anlamalıdır. Həm nikaha, həm də boşanma prosesinə ciddi yanaşmaq lazımdır.
Aytən, Bizimyol.info
