"Meta AI" söhbətləri xatırlayaraq daha çox fərdi tövsiyələr təqdim edəcək. "Facebook" və "Instagram" məlumatları tövsiyələrə daxil ediləcək.

Bizimyol.info "webtekno"ya istinadən xəbər verir ki, "Meta", süni intellektlə işləyən chatbot "Meta AI"a istifadəçi təcrübəsini yaxşılaşdıracaq yeni funksiyalar əlavə etdi. İndi "Meta AI" söhbətlərdən öyrəndiyi məlumatları yadda saxlamaqla daha çox fərdiləşdirilmiş cavablar təklif edə biləcək.

"Meta"nın açıqlamasına görə, ABŞ və Kanadadakı "Facebook", "Messenger" və "WhatsApp" istifadəçiləri botdan onlar haqqında müəyyən məlumatları saxlamağı xahiş edə biləcəklər. Məsələn, istifadəçi səyahət etməyi sevdiyini və ya vegan olduğunu bildirirsə, "Meta AI" gələcək söhbətlərdə bu məlumatları nəzərə alacaq.

"Meta AI"nin yeni xüsusiyyəti "OpenAI"nin "ChatGPT" və "Google"un Gemini modellərindəki yaddaş sistemləri ilə eyni şəkildə işləyəcək. Lakin "Meta" qeyd edib ki, bu məlumat yalnız təkbətək söhbətlərdə istifadə olunacaq və qrup çatlarında qeyd olunmayacaq.

"Meta AI", həmçinin daha dərin fərdiləşdirməni təmin etmək üçün "Meta" tətbiqlərindən hesab məlumatlarından istifadə edə biləcək. Məsələn, "Facebook"da məkan məlumatları və ya "Instagram"da baxılan videolar botun tövsiyələrinə daxil ediləcək. İstifadəçilər istənilən vaxt botun qeyd etdiyi məlumatları silə biləcəklər, lakin fərdiləşdirilmiş tövsiyələrdən tamamilə imtina etmək mümkün olmayacaq.

"Meta" bu yeniliklərin ilk olaraq ABŞ və Kanadada tətbiq ediləcəyini açıqlayıb. Şirkətin məlumatların məxfiliyi ilə bağlı keçmiş mübahisəli statusu bu yeniliklərin istifadəçilər tərəfindən necə qəbul ediləcəyi ilə bağlı qeyri-müəyyənlik yaradır. Xüsusilə, şəxsi məlumatların daha geniş kontekstdə istifadə olunması bu yeniləmələrin reaksiyalara səbəb ola biləcəyindən xəbər verir.

Qadir, Bizimyol.info