Rusiya prezidentinin mətbuat katibi Dmitri Peskov bildirib ki, Moskva daim beynəlxalq dialoqda iştirak edir, “Rusiya təcrid olunmuş vəziyyətdə deyil”.

Bizimyol.info xəbər verir ki, belə ki, o, jurnalistlərin xahişi ilə BRİKS-in Kazanda keçiriləcək sammitinə 20-dən çox dövlət başçısının gələcəyinə münasibət bildirib, baxmayaraq ki, Qərb davamlı olaraq Rusiyanın təcrid olunmasından danışır.

“Rusiya nə keçmişdə, nə də indi təcrid olunmuş vəziyyətdə deyil. Xüsusilə müasir dünyada hər hansı bir ölkəni, xüsusən də Rusiya Federasiyası kimi dövləti təcrid etmək çox çətindir”, - deyə Peskov vurğulayıb.

Onun sözlərinə görə, Rusiya, bir çox strateji tərəfdaşları kimi, “ayrı-ayrı dövlətlərin, yəni ABŞ-ın qısamüddətli maraqların lehinə müəyyən etdiyi qaydalara” deyil, beynəlxalq hüquqa əsaslanan münasibətlərə can atır.

“Bunlar qarşılıqlı hörmətə, qarşılıqlı maraqlar nəzərə alınmaqla, qarşılıqlı faydalı əməkdaşlığa əsaslanan münasibətlərdir. Bu cür yanaşmalar dünya ölkələrinin böyük əksəriyyətini tamamilə cəlb edir. Bu səbəbdən beynəlxalq dialoq davam edir. Rusiya isə bu beynəlxalq dialoqun tərkib hissəsidir”- deyə o, gələcəyin optimal obrazını təsvir edib.

Kreml nümayəndəsi qeyd edib ki, bu dialoq çərçivəsində heç kim dominant mövqe tutmağa və öz iradəsini başqalarına sırımağa çalışmır. “Dünyanın daha çox ölkəsi məhz buna çalışır”, - deyə Rusiya Federasiyası Prezidentinin mətbuat katibi bildirib.

Qadir, Bizimyol.info