Jurnalist İradə Zeynalova Rusiyanın Mavrikiy Respublikasına səfiri təyin edilib.

Bizimyol.info xəbər verir ki, bu barədə Rusiya prezidenti Vladimir Putin müvafiq sərəncam imzalayıb.

“İradə Avtandilovna Zeynalova Rusiya Federasiyasının Mavrikiy Respublikasında fövqəladə və səlahiyyətli səfiri təyin edilsin”, - deyə sərəncamda qeyd edilir.

Dövlət başçısı digər sərəncamla hazırkı səfir Konstantin Klimovskini tutduğu vəzifədən azad edib.

Zeynalova 1995-ci ildə Moskva Aviasiya Texnologiyaları İnstitutunu bitirib və 1997-ci ildə televiziyada fəaliyyətə başlayıb. Jurnalist "RTR"də (indiki "Rossiya-1") "Vesti" proqramının redaktoru olub və 2000-2003-cü illərdə bu proqramın və onun son buraxılışı olan "Vesti Nedeli"nin müxbiri işləyib. 2003-cü ildə Birinci Kanala köçüb, burada 2016-cı ilə qədər işləyib, müxtəlif illərdə, o cümlədən kanalın Böyük Britaniya və İsraildəki bürosuna rəhbərlik edib və 2012-ci ildən "Zaman" proqramının bazar buraxılışında aparıcı olub. 2016-cı ildən "NTV"də “İradə Zeynalova ilə həftənin yekunları” verilişinin aparıcısıdır.

Rusiya ilə Şərqi Afrikada yerləşən Mavrikiy arasında diplomatik əlaqələr 1968-ci il martın 17-də qurulub. Səfir vəzifəsini tutan Klimovski Rusiya mətbuatına müsahibəsində deyib ki, kollektiv Qərbin təzyiqlərinə baxmayaraq, Mavrikiy hələ də ölkələr arasında ənənəvi dostluq münasibətlərinə əsaslanan ikitərəfli əməkdaşlığın fəal inkişafına sadiqdir.

Qadir, Bizimyol.info