"Apple" 98 ölkədəki "iPhone" istifadəçilərinə casus proqram hücumları barədə xəbərdarlıq edib. Son xəbərdarlıq bu ilin ikinci xəbərdarlığı olub.

Bizimyol.info "trthaber"ə istinadən xəbər verir ki, ötən ilin aprelində 92 ölkədəki istifadəçilər oxşar bildiriş aldılar.

"Apple" bu bildirişləri 2021-ci ildən bəri müntəzəm olaraq göndərir və 150-dən çox ölkədə istifadəçilərə çatır. Çərşənbə günü dərc edilən son xəbərdarlıqlarda hücum edənlərin kimliyi və ya istifadəçilərin bildirişləri aldığı ölkələr haqqında ətraflı məlumat verilməyib.

Təsirə məruz qalan müştərilərə göndərilən xəbərdarlıqda şirkət: ""Apple", "Apple ID"nizlə əlaqəli "iPhone"unuzu uzaqdan təhlükə altına salmağa çalışan pullu casus proqram hücumuna məruz qaldığınızı aşkar edib. Bu hücum çox güman ki, kim olduğunuza və ya nə etdiyinizə görə sizi hədəfləyir. Bu cür hücumları aşkar edərkən mütləq əminliyə nail olmaq heç vaxt mümkün olmasa da, "Apple" bu xəbərdarlığa çox arxayındır, lütfən, bunu ciddi qəbul edin", -deyə bildirib.

İstifadəçi ifadələrinə görə, Hindistandakı istifadəçilər "Apple"ın son təhdid bildirişlərini alanlar arasındadır. "Apple" oktyabr ayında ölkədəki bir çox jurnalist və siyasətçiyə oxşar xəbərdarlıqlar göndərib.

İnsan haqlarını müdafiə edən "Amnesty İnternational" qrupu daha sonra bildirdi ki, İsrailin "NSO Group" şirkəti tərəfindən hazırlanmış yüksək aqressiv casus proqram olan "Pegasus"un Hindistanın tanınmış jurnalistlərinin "iPhone"larında olduğunu aşkar edib.

"Apple" təsirə məruz qalan istifadəçilərə etdiyi bildirişdə, təhlükənin müəyyən edilməsi üsullarının həssas xarakterini vurğulayıb və əlavə təfərrüatların açıqlanmasının təcavüzkarların gələcəkdə aşkarlanmasından qaçmasına kömək edə biləcəyini söyləyib.

Şirkət keçən ildən bəri istifadə etdiyi dildə də əhəmiyyətli dəyişiklik edərək, bu hadisələri daha əvvəl istifadə edilən “dövlət tərəfindən dəstəklənən” hücumlar deyil, “ödənişli casus proqram hücumları” kimi təsvir etməyi seçib.

Qadir, Bizimyol.info